(532) Adverbow Termyn - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Me a garsa hedhyw côwsel adro dhe nebes a’n adverbow termyn neb yw kebmyn in Kernowek. Kyns oll ny a gav hedhyw ‘today,’ rag ensampel in hedhyw me a dhesîr dre ow grâss dallath an bÿs (Origo Mundi). Y hyll hedhyw i’n jëdh bos ûsys rag styrya ‘nowadays’, rag ensampel: ha pell yw meur a’n bobel resys hedhyw i’n jëdh dhyworth an kethsam rêwl-ma (Tregear). Saw yma i’n jêdh hedhyw ow mênya ‘this very day’ rag ensampel in in oos me yw i’n eur-ma try hans try ugans in prov ha whath pymp moy pàn eus dhym cov i’n jëdh hedhyw (Creacyon an Bÿs). Hedhyw gans myttyn yw ûsys rag sygnyfia ‘this morning’, rag ensampel in pàn sefsys hedhyw myttyn certan yagh êns aga gyew (Passio Christi). ‘Tomorrow’ in Kernowek yw avorow rag ensampel: Gwaityowgh bones avorow ow conys i’n cres an dre (Origo Mundi); Ha dewgh avarr avorow my a’gas pÿs (Origo Mundi); Gwra owna gàs fordhow hedhyw pò avorow ha why ’ell bos den dâ whath (Gwavas). ‘The next day’ in Kernowek yw ternos; rag ensampel: Ternos y sordyas bresel gans an Yêdhewon gocky (Passyon agan Arlùth); An Yêdhewon ny vynna bos an ladron ow cregy ternos, rag Pask o dhedha (Passyon agan Arlùth). Rag ‘the next morning’ ny a yll leverel nessa myttyn, rag ensampel: Ha nessa myttyn an gwadn-gwrê’ty, hy a dhalathas dha wil cry ’ter o hy dremas hy destries (Lhuyd). Lhuyd a lever inwedh fatell yw trenja an ger Kernowek rag ‘the day after tomorrow.’ ‘The day after the day after tomorrow’ warlergh Lhuyd yw godreva. I’n gwetha prÿs, nyns eus ensampel vÿth i’n textow a onen vÿth a’n dhew er-na. Ny a wor bytegyns fatla yllyr leverel ‘within a week’, ‘within three days’, h.e., in Kernowek. Merowgh orth an examplys ma: me a’n dreha sur arta kyns penn treddÿdh re’m lawta (Passio Christi); ha rewardys ty a vÿdh adhyworthyf vy re’m fÿdh sur kyns penn vis (Passio Christi). Lhuyd a dherif dhyn inwedh fatla yllyn ny leverel ‘A week from today’, hèn yw an jorna-ma wàr seythen. Ev a re dhyn kefrÿs an dhew adverb de ‘yesterday’ ha dêgensetê ‘the day before yesterday.’ ‘Yesterday evening’ yw kefys in: ny veuv in scol re’m lowta bys in newher gordhuwher (Bêwnans Meryasek). An fordh sempelha dhe leverel ‘a week ago’ yw seythen alebma, gwelys in Me ’wrug fanja gàs lether seythen alebma, bùs nag era termyn dym de screfa dywgh straft arta (Oliver Pender). Gwra comparya: Ma lever bian rybom’ dro dha Arlodhes Kernow scrifys rag an flehes neb bledhenyow alebma (Nicholas Boson). In Kernowek an fordh dhe leverel ‘past time, the past’ yw an termyn passys, rag ensampel: Mar teffa an epscobow ha’n brontyryon i’n termyn passys…desky ha practycya aga dûty ha’ga vocacyons, surly ny wrussa an eglos a Crist dos dhe’n dysonour ha’n dysordyr a welsyn ny (Tregear). Pelha ny a wor an fordh dhe leverel ‘In the olden days, once upon a time’ rag yma an lavar dhe weles orth dallath Jowan Chy an Hordh: I’n termyn eus passys th’era tregys in Seleven den ha benyn in tyller cries Chy an Hordh .