© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
I’n Kernowek tradycyonal an ger kemmys, kebmys yw kefys yn fenowgh hag yma va ow styrya ‘as many, so many’. Ot obma nebes examplys i’n textow: Y vamm wheg Maria wynn, pùb eur fystena a wre may halla dos wàr y bynn y mab kemmys a gara (Passyon agan Arlùth); Caym, ny vedhyth indella, rag dha ladha den mar qwra, ev a’n jevyth seyth kemmys (Origo Mundi); warbarth oll hy fehas glân dethy hy y fÿdh gyvys, rag kemmys hy dhe’m cara (Passio Christi); pòr wir dhe’n mernans ev â hag ev ha kemmys a’n sew (Resurrexio Domini); rag nefra certan ow bannath vy gans bannath Crist penn an sens dhe kemmys ow gol a syns pesaf bys venary (Bêwnans Meryasek); me a lever dhodho “fy!” ha dhe kemmys a’n syns Duw (Bêwnans Ke); kemmys pehas eus i’n bÿs ha nynj eus tamm amendya, mayth yw an Tas Duw serrys gans oll pobel an bÿs-ma (Creacyon an Bÿs). Mars on ny whensys dhe wovyn ‘how much? how many?’ ny a yll leverel pygemmys, saw res yw avowa nag eus ma’s dew exampyl a hedna i’n textow. Ot obma an kensa exampyl: bedhens gevys dhe’n re-ma ’ga nycyta, rag ny wodhons pygemmys ymowns y sur ow peha (Passyon agan Arlùth);. Hèm yw an secùnd exampyl: my a’s gorr adro dhodho may haller godhvos dhe wir ha gweles in bledhen hir pygemmys hÿs may teffo (Origo Mundi). Merkyowgh i’n lavar dewetha-na yma pygemmys owth obery avell gnas-êr pò ‘adjective’ hag yma pygemmys hÿs ow sygnyfia ‘how much length, how long.’ Heb mar yma geryow erel in Kernowek rag govyn ‘how many, how much’. Onen a’n re-na yw pes ‘how many?’, rag ensampel in kescows Andrew Borde ny a red: Pes mildir eus alemma dha Loundres? Ger aral yw pyseul ‘how many, how much’, rag ensampel: ty a’fÿdh mens a vynny; govyn worthyn heb lettya pyseul a vynnyth defry (Passio Christi); Rag henna mars eus marveur gallus in ger agan Arlùth Crist, dha gwil pÿth nynj o derag dorn, pyseul moy gallus dhe gonys, ha chaunjya an pÿth nag o derag dorn (Sacrament an Alter). Homylys Tregear yw text prôs hir ha’y erva yw nebes dyffrans dhyworth lies onen a’n textow erel. A les ywa dhyn ytho in pana vaner usy ev ow rendra ‘how many’. Kyns oll yma va owth ûsya pana lies. Ytho in y homylys ny a gav: Pana lies gwedhowes a veu gesys heb confort? Pana lies flogh omdhevas a veu gesys heb confort na sùcour? Pana lies testament ha blonojeth an marow a veu terrys ha gesys heb collenwel gans intentys ha ordynans anedha? In tyller aral bytegyns yma Tregear owth ûsya an geryow pana lowr ‘how many’ i’n lavar pana lowr torn ‘how many times, how often’: sow nyns o ev methek dhe confessya y pehosow, pana lowr torn a wrug ev ernestly ha lamentably desîrya an mercy a Dhuw rag y offencys ha’y pehosow. Wàr verr lavarow ytho, ‘how many, how much’ in Kernowek yw pygemmys; pes; pyseul; pana lies; ha pana lowr i’n lavaren pana lowr torn ‘how many times, how often’.