© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Prierynsy yw viaj dhe dyller sans rag onoura Duw pò duwow an prieryn. Exampyl dâ a brierynsy yw Hajj an Moslems. Yth yw hedna onen a bymp pyllar aga crejyans rag y tal dhe bùb Moslem mos ar Hajj dhe Mecca in Araby Sawdy unweyth in y vêwnans. Prierynas Cristyon a wre travalyas kyns oll dhe dyleryow kelmys gans genesygeth, bêwnans, crowsyans ha dasserhyans Crist. Y fedhens ow mos dhe’n Pow Sans dhyworth an peswora cansvledhen in rag. Pelha prierynas a wre mos dhe Rom. An practys o brierynsy o scodhys yn crev gans Sen Elena, mabm Costentyn Meur. I’n seythves cansvledhean an Pow Sans a veu conqwerrys gans an Sarsyns ha calessa o rag prierynas viajya dy. Rag hedna y feu dysplêgys tyleryow nowyth rag prierynsy in West a Ewrop. Onen a’n re-na o Fordh Sen Jamys dhe Campostela in North-West a Spayn. Y feu an Crowscasow pò ‘Crusades’ restrys rag daskemeres an tyleryow sans dhyworth an Moslems hag indelha dhe êsya an fordh rag prierynas. I’n dedhyow-na y feu ordrys fùndys rag ôstya prierynas. Onen a’n ordrys-na o Ordyr Sen Jowan pò rag bos moy kewar Ordyr Marhogyon Spytioryon a Sen Jowan a Jerùsalem. An Varhogyon bytegyns a veu drîvys in mes gans an Tùrkys hag y êth dhe Enys Rhodes. An Tùrkys a’s tôwlas in mes alena inwedh hag y a anedhas in Enys Malta. Yth esa scrîn in onour Sen Tobmas Becket in Peneglos Canterbùry i’n Osow Cres. Yma Whedhlow Canterbùry gans Jeffry Chaucer cùntellyans a whedhlow derivys gans prierynas wàr aga hens dhyworth Loundres dhe scrîn Sen Tobmas in Canterbùry. In Pow an Sowson hag in powyow erel in Ewrop tùchys gans an Reformacyon chaunj brâs a wharva in stauns Cristonyon tro ha’n practys a viajya dhe dyleryow a brierynsy. Yth o an practys a brierynsy kelmys gans onoura imajys, devôcyon dhe’n syns, dendyl meryt ha’n grauntyans a indùljencys. I’n dallath yth o Martyn Lûther dowtys adro dhe valew an prierynsy, saw wàr an dyweth ev a dhalathas dampnya an practys yn tien. I’n vledhen mil pymp cans hag ugans ev a dheclaryas: Y codhvia dhe genyver prierynsy bos stoppys. Nyns eus valew vÿth inhans; nyns yns y demondys dre arhadow vÿth, nyns usy obêdyens vÿth kelmys gansans. I’n contrary part yma prierynsiow ow ry dhe’n prierynas lies ocasyon dhe beha ha dhe dhespîtya comondmentys Duw. Spessly Lûther o prederus ow tùchya an prierynsy avell ober dâ pò meryt, pàn na ylly an Cristyon herwyth y savboynt ev, bos selwys ma’s dre fydhyans in grâss Duw. In Pow an Sowson hag in powyow Protestant aral an practys a viajya wàr brierynsy a cessyas ha lies scrîn a veu destrîes. I’n powyow Catholyk Roman bytegyns an practys a viajya wàr brierynsy a bêsyas ha tyleryow benegys nowyth a veu gwrÿs, rag ensampyl Lourdes in Frynk ha Fatyma in Portyngal. An Werhes Ker Maria a veu gwelys gans arlodhes nôbyl in Walsingham, Norfolk, i’n unegves cansvledhen. Y feu an scrîn ena degës i’n whêtegves cansvledhen. Scrîn Anglycan a veu dasfùndys i’n vledhen nawnjek eth warn ugans. Scrîn Catholyk Roman a veu egerys in nawnjek dewdhek warn ugans in Houghton, udn vildir dhyworth Walsingham.