(538) Hilieth Sciensek - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Dell hevel y whrug hilieth sciensek ‘scientific racism’ pò hilieth vewonek ‘biological racism’ dallath i’n seytegves cansvledhen ha pêsya bys i’n dedhyow wàrlergh secùnd gwerryans an bÿs. Hilieth sciensek o kebmyn yn arbednyk in bledhydnyow avarr an ugansves cansvledhen. Yth esa pùb biologyth ogasty owth acordya gensy. Nyns eus den vÿth lebmyn owth agria gans tybyansow an fugs-sciens-na. Hilieth sciensek o an dyscans fatell o kynda mab den rydnys in certan kenedhlow pò ‘races’; indelha radn a’n kenedhlow-na o moy avauncys ès kenedhlow erel. Wàrlergh an dhamcanieth-na dre vrâs yth o kenedhlow gwydn Ewrop an kenedhlow moyha avauncys in oll an bÿs; oll an kenedhlow erel o iselha ès an Ewropeans. Wosa an Ewropeans y hylly reckna pobel Eynda, hag ena poblow an ÿst a Âsya; ha wàr aga lergh y arta res o reckna an Afrycans ha genesygyon Austrâlya. Yth o tybyansow an sort-na mar gebmyn dre rêson a dhyscans Charlys Darwin. Ev a wre desky fatell o appys ha mab den devedhys dhyworth an keth hendasow. Mars o hedna gwir, ena an appys brâs o kenderwy mab den. I’n câss-na res o agria fatell o certan kenedhlow a gynda mab den nessa dhe’n appys ès esely erel. Hèn o an rêson may fedha pygmys Afrycan gorrys warbarth gans appys in milvaow Amerycan in bledhydnyow avarr an ugansves canvledhen. An Natsys o an bagas mayth o tybyansow hilek moyha a les dhodhans. In gwir damcaniethow hilek ‘racial theories’ o an very fùndacyon a stauns an Natsys tro ha kynda mab den. An Natsys a gresy fatell o an Aryans an kenedhel uhelha oll—kynda an vêstrysy. An Aryans o an Eynd-Ewropeans a’n North a Ewrop. An re-na herwyth an Natsys, o uhel aga horf, melen aga blew ha gwydn aga crohen. An examplys gwelha anodhans o an Jermans ha’n poblow erel a’n North a Ewrop. Heb mar an bobel a’n sort iselha o an Yêdhewon ha hedna o ascûs rag an Natsys dh’aga dyghtya mar wherow—eâ, ha ladha mylyons anodhans. Apert o bytegyns na ylly den fur consydra an Yêdhewon dhe vos an bobel lyha avauncys. Cler o in dedhyow an Natsys kyn fe, fatell esa an Yêdhewon ow qwainya moy gobrow Nôbel ès ken bagas vÿth. Nyns yw biologydhyon acordys gans flows hîlek an Natsys na felha. Saw i’n lacka prÿs yma gockyneth an Natsys ow pêsya in mesk gwarthevydhyon wydn pò ‘white supremacists’ agan dedhyow-ny.