© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma moy ès udn ger usy ow mênya ‘bad’ in Kernowek. Kynth usy gwann, gwadn ow sygnyfia ‘weak’, yma dhodho an styr ‘bad’ traweythyow, pàn vo an ger ûsys avell rag-gorrans, rag ensampel in saw gwannrêwl yma omma na yllyn lîvya kyn mos (Bêwnans Meryasek); ha nessa myttyn an gwadn-gwrê’ty, hy a dhalathas dha wil cry ter o hy dremas hy destries (Lhuyd). An secùnd ger yw tebel. Kepar ha gwadn- hèn a dal bos gorrys dhyrag an hanow: rag ensampel: tebel-el ‘devil’ (Passyon agan Arlùth, Bêwnans Meryasek, Bêwnans Ke, Tregear); tebel-dhen (Passio Christi, Resurrexio Domini); tebel-cryjyans (Passio Christi); tebel-was, tebel-wesyon (Passyon agan Arlùth, Passio Christi). An tressa ger yw drog-, rag ensampel drog-dhen, drog-dhewas, drog-venyn ha drog-lamm. Drog yw hanow inwedh rag ensampyl drog ha dâ. Res yw remembra bytegyns na yll an gnas-er drog bos ûsys warlergh hanow. Ny yllyr leverel *tybyans drog, *ky drog na *gwrians drog. Pelha ny yllyr gwil devnyth a drog gans yn dhe wil adverb; nyns yw *yn trog kefys in tyller vÿth i’n tavas Kernowek. An peswora ger yw bad; heb mar hèn a veu benthygys dhyworth Sowsnek. A les yw bytegyns fatell yw bad kebmyn lowr i’n textow Kernowek. Kyns oll res yw convedhes fatell usy bad ow styrya ‘bad of a servant, negligent, careless.’ An styr-na a yll bos gwelys in Whath kerhowgh dhmmo Pylat; in y gever dell veuv bad (Resurrexio Domini); godhvedhowgh ma na vowgh bad—tus owgh a brîs (Resurrexio Domini). Bad i’n sens-ma a yll bos ûsys avell adverb inwedh; rag ensampel: Tebel-servont a lever, mar serv ev bad y vêster, kê dha honen ha gwra gwell (Passio Christi). Yma bad yn sempel ow styrya ‘bad, evil’ inwedh. Rag ensampel yma an lavar dâ ha bad ‘good and bad’ avell gnas-eryow kefys i’n tavas tradycyonal; an roos a gemmer inhy kefrÿs an puscas dâ ha’n bad warbarth (Tregear). Merkyowgh spessly an lavar-ma in mes a Sacrament an Alter: [Not] ev dhe recêvya an pÿth yw bad [ma’s] ev a recêvyas warlergh bad maner. Ena yma bad ow sewya an verb bos i’n present-devedhek; pelha warlergh bad maner yw sampel spladn a bad ûsys dhe wil an adverb ‘badly’. Yth yw bad ûsys dhyrag hanow in Creacyon an Bÿs rag ensampel: whath kynth yw ow hendas Cayn pòr bad den lower acôntys, me a’n kebmer in dysdain mar ny vedhaf vy prevys whath meur lacka. Yma bad dhe weles kefrÿs obma: Mar ny’m beus an dra ’dheffa prevy pyw a wrug an bad-ober, my a vedn cregy ragtho (Jowan Chy an Hordh).