(543) Vittorio Veneto - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Me a spênas seythen agensow in cyta gelwys Varese in Lùmbardy in North a Italy, ogas lowr dhe oryon Pow Swyts. Onen a’n strêtys in cres an dre yw gelwys Via Vittorio Veneto. Vittorio Veneto o tyller batel vrâs in Kensa Gwerryans an Bÿs. Vittorio Veneto yw cyta ha kemeneth in North-Ÿst a Italy. Wostallath an cyta o dyw gemeneth dhyffrans, saw y a veu jùnys warbarth avell udn vùrjestra i’n vledhen êtek whe deg ha whe ha’n dre nowyth a veu henwys warlergh mytern Italy an Secùnd Vittorio Emanuele. In mis Du a’n vledhen nawnjek seytek lu Austro-Ùngary a fethas soudoryon gwlascor Italy in batel uthyk Caporetto (Kobarid in Slôvênya hedhyw) ha’n Italyans a wrug kildedna lies mildir. Hùmbrynkyas Uhelha army rial Italy, Luigi Cadorna, a veu constrînys dhe asa y soodh hag Armando Diaz a gemeras y le. Diaz a dhasrestras an army Italyan ha’n nessa bledhen an Italyans a assaultyas army Austro-Ùngary i’n secùnd batel a Dhowr Piave. Hedna a veu fethans poos rag army imperyal Austrya. Austro-Ùngary a gollas moy ès udnek mil soudour ledhys, peswar ugans mil pystygys ha moy es peder warn ugans mil kemerys prysner. Dre rêson y dhe vos vyctoryùs an Italyans a assaultyas lu Austro-Ùngary arta. An vatel a dhuryas dhyworth peswar warn ugans Hedra nawnjek êtek bys i’n tressa Du in spâss ledan dhyworth Monte Grappa bys i’n mor; comondys veu dhe’n lu Italyan warbarth gans aga gweresoryon Vretednek, Frynkek hag Amerycan, dhe gerdhes dres Dowr Piave tro ha Vittorio Veneto may hallens indelha trehy an kemunessans inter an dhew army Austryan dhyragthans. An vatel-na yw aswonys avell Batel Vittorio Veneto. I’n vatel y feu kemerys prysner try hans ha hantercans mil soudour Austryan, ha comprehendys i’n nyver-na o lies esel a’n mynoritas i’n empir. In kettermyn yth esa taclow ow tysplêgya in polytygieth Austro-Ùngary. Orth dyweth Hedra an Checkas a dheclaryas aga fow dhe vos anserhak a Austro-Ùngary. Ternos cùntellyans a Soth-Slavas a dheclaryas y dhe vos anserhak inwedh. Try dëdh wosa hedna seneth Ùngary a dheclarys nag o Ùngary radn a’n monarky na felha ha’n kensa dëdh a vis Du governans nowyth Ùngary a elwys tre oll an soudoryon a dhevedhyans Ùngarek. Awos oll an declaracyons-na Uhel-hembrynkysy Austrya a gomendyas kilden jeneral dh’aga luyow. Hedna a styryas nag o Monarky Dewek Austro-Ùngary pow inhy hy honen na felha hag ytho na ylly hy pêsya gans an gwerryans. I’n mêntermyn yth esa an Jermans owth omlath yn fers in voward an North. Saw omwheles Austrya a veu an bobm dewetha ragthans. An Jermans a besys cres orth an gefrysysy ha’n unegves Du nawnjek êtek Gwerryans an Bÿs a dhewedhas.