© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In system sonyow an Kernowek yth eson ny ow merkya fatell yll an kesson /l/ rowndya an vogalen dhyragtho. Hèn yw gwelys rag ensampel i’n ger rag ‘heart’. In Kembrek ‘heart’ yw calon gans /a/ avell an kensa vogalen. In Bretonek an ger yw kalon. In Kernowek bytegyns ‘heart’, dell woryn ny oll, yw colon. Dell hevel an kesson /l/ re wrug rowndya an /a/ dhe /o/. In Kembrek ‘salt’ yw halen; comparyowgh Godhalek salann ‘salt’, saw in Kernowek an ger yw holan, rag yma John Boson i’n Cân an Hern ow screfa holan moy. Arta yth hevel fatell veu /a/ chaunjys dhe /o/ dhyrag /l/. Onen a’n geryow rag ‘late’ in Kernowek yw holergh. Nyns yw hedna kefys ma’s unweyth, hèn yw in Pan o pur holergh an gyth y tefenas unn marhek (Passyon agan Arlùth). An ger holergh a dhysplêgyas dhyworth he+lergh, saw yth hevell fatell veu rowndys an /e/ dhe /o/ dhyrag /l/. Dre lycklod an dysplêgyans a /a > o/ hag a /e > o/ a wharva in pùb exampyl rÿs genef bys lebmyn, pàn o an sylaben in qwestyon heb an pooslev warnedhy, hèn yw dhe styrya in Kernowek Coth avarr. An lack a booslev wàr an sylaben dre lycklod a êsyas an dysplêgyans. Onen a’n geryow rag ‘already’ in Bretonek yw seulabred. Dell hevel an ger-na yw gwrÿs a dhew element: seul (gwelys in Kernowek rag ensampel in py seul ‘how many’) hag abred, Kernowek abrÿs. In Kernowek bytegyns an /l/ re wrug rowndya an kensa vogalen; otobma oll an examplys in Kernowek tradycyonal: Nans yw groundyys genef vy solabrys gans horbenow (Origo Mundi); ow tybbry gynef yma a’m tallyour yn keth bos ma neb re’m guerthas sollabreys (Passyo Christi); pan wolow re bue oma sollabreys (Bêwnans Meryasek); Na ve ow mayster, heb dowt me a thothya solabrys (Bêwnans Ke); Solabrys kynth of cryys, the’n turant ny vetha’ mos (Bêwnans Ke). Nyns eus exampyl vÿth i’n tavas tradycyonal a’n ger solabrÿs gans <eu> pò <e> in kensa sylaben. In gwetha prÿs yma Gerlyver wàr lînen an Academy Kernowek rag ‘already’ ow ry dhyn seulabrys, seulabres. An formys-na yw cabm ha trueth yw fatell vowns y bythqweth gorrys in gerlyver offycyal Kernowek. Yma gerlyver an Academy rag ‘long since’ ow profia seuladhydh, seuladhedh. Yma pymp exampyl a’n ger-na i’n textow tradycyonal hag in kenyver exampyl an ger yw soladhyth pò soladheth gans /o/ i’n kensa sylaben. An Kernowek rag ‘already’ yw solabrÿs, solabrës ha rag ‘long since’ soladhÿdh, soladhëdh. In câss an dhew er-ma yma screforyon Gerlyver an Academy owth hùmbrank aga redyoryon wàr stray.