© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Anyet (in Sowsnek St Neot) yw pendra wàr an amal soth a Wûn Brèn. Dell hevel henwys veu an tyller warlergh sans a’n keth hanow. Ev o genys i’n nawves cansvledhen saw nyns yw certan pyw o va na pandr’o y dhevedhyans. Yma dhyn dew dherivas a’y vêwnans ha nyns yw an taclow leverys adro dhodho i’n dhew versyon owth agria gans y gela. Dre lycklod Anyet o Kernow, saw yma comendys in onen a’n dhew dherivas fatell o va Saxon genys. Yth esa ev tregys avell managh in Enys Wedren (Glastonbury) saw ev a omdednas alena ha mos dhe Gernow may halla va bos eremyt. Leverys yw fatell wrug Anyet vysytya an Pab in Rom ha’n Pab a gomendyas dhodho byldya managhty in Kernow. Ev a wrug indelha hag yth o tyller managhty Anyet/St Neots gelwys Neotsoke i’n dedhyow-na. Leverys anodho inwedh fatell wre va cowethya gans Alfred, mytern an West-Saxons. Yth yw lies merkyl ascrîbys dhe Anyet. Rag ensampel Anyet a wre gonys gwaneth i’n tir adro dh’y vanaghty. Udn jëdh ladron a dheuth hag a ladras y ohen. Rag hedna Anyet a bejys Duw ha kyrwas ogas dhe’n managhty a dheuth rag aras an dor in le an ohen. Wosa hedna an ladron a gemeras edrek hag a wrug restorya y ohen dhe Anyet. Pelha an ladron a veu gwrÿs menegh in y vanaghty. Udn jëdh yth esa Anyet ow cana salmow ryb y fenten veurgerys pàn dheuth bys dhodho ewyk esa helghyor ha keun orth hy chassya. Hy a bonyas brawehys dhe Anyet ha gorwedha orth y dreys. An keun a dhrehedhas in udn hartha yn whyls. Saw pàn welsons an ewyk dhyrag Anyet, y a dhepartyas heb hy fystyga. An helghyor o den nôbyl; ev a dheuth dhe Anyet ha’y besy dhe gomendya bêwnans compes dhodho. Anyet a gomendyas bêwnans managh dhodho hag ev a veu managh in managhty Anyet. An sans a’n jeva pysklyn esa try fysk inhy. Mar ny wre Anyet ma’s kemeres udn pysk orth an prÿs in mes anedhy, y fedha try fysk i’n poll pùpprÿs. Servont Anyet o gelwys Baryùs hag ev o dywysyk saw nebes gocky. Unweyth pàn o Anyet clâv, Baryùs heb godhvos vertu an bysklyn a gemeras dew bysk warbarth hag a wrug aga fryjyon avell prÿs boos rag y vêster. Pàn welas Anyet an dhew bysk parusys warbarth, ev a veu diegrys. Ev a savas in mes a’y wely ha gorra an dhew bysk bryjys dell êns arta i’n dowr. Y a dhasvêwas ha bythqweth arta ny veu otham dhe Anyet a bysk, mar ny vedha kemerys ma’s udn pysk in mes a’n poll.