(547) Jory Stephenson - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Jory Stephenson a veu genys i’n vledhen mil seyth cans eth deg onen in Wylam, Northumberland, ogas dhe Castel Nowyth wàr Dhowr Tyne. Ny ylly y gerens naneyl redya na screfa. Pàn o Jory seytek bloodh, ev a gafas ober avell jynor in bal glow. Jory a gonvedhas fatell o dyscans a bris hag ev a wrug pe rag lessons gordhuwher rag desky redya ha screfa. I’n vledhen êtek ha dew ev a dhemedhas ha’n kespar o tregys in udn rom a benty. Jory a wre eskyjyow hag êwna clockys rag encressya aga mona. Y a gavas mab, henwys Robert, i’n vledhen êtek ha pymp. Nessa bledhen myrgh a veu genys saw an vyrgh ha’y mabm a verwys a’n drog skevens. Jory a erviras whelas whel in Scotlond ha gasa y vab gans kentrevoges. Ny wortas ev ma’s termyn cot in Scotlond saw dewheles dhe Bow an Sowson yn scon. Y whor dhydhemeth a dheuth dhe gemeres with a’n maw. Nyns esa jyn pùmpya owth obery yn ewn in onen a’n pyttys i’n côstys-na. Jory a’n amendyas mar dhâ may feu va appoyntys jynor rag oll an whelyow glow ader dro. Yth esa lies tardhans ow wharvos i’n balyow glow dre rêson a flabmow noth i’n airgelgh gassek. Jory a dhalathas gwil lantern sawder a vydna lesky heb gwil tarednans. Kyn na’n jeva Jory descans in sciens, dre drial ev a dhesmygyas lantern mayth esa an air owth entra dre dell munys heb alowa dhe’n flabmow dos in mes. I’n kettermyn yth esa an Kernow Hùmfry Davy ow lavurya wàr y lantern sawder y honen gans nywlwias po ‘gauze’ in le tell munys. An Gowethas Rial a rauntyas dyw vil buns dhe Davy rag y lantern, ha Stephenson a veu acûsys a ladra an tybyans dhyworth Davy; nyns o Stephenson consydrys dhe vos mar dhâ avell sciensyth deskys. Kessedhek in côstys Castel Nowyth a dhetermyas fatell wrug Jory lavurya wàr y lantern yn anserhak orth Davy hag y a ros dhodho mil buns. Kyn nag ylly Davy y gresy, Chy an Gebmyn a erviras fatell o an gwir dhe Jory bos onen a’n dhew a dhesmygyas an lantern sawder. I’n vledhen êtek onen warn ugans Jory a glôwas a dowl dhe vyldya hens horn gans mergh tedna inter Stockton ha Darlington rag carya glow. Jory a gôwsas orth an menystror ha’y berswâdya dhe alowa dhodho byldya jyn êthen rag an lînen. In mis Gwydngala êtek pymp warn ugans train rag viajoryon tednys gans jyn Stephenson a wrug resek dhyworth Darlington dhe Stockton ow carya peswar cans ha hantercans person orth toth pymthek mildir i’n eur. Indelha oos an hens horn a veu genys.