© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An peder seythen dhyrag Nadelyk yw gelwys Asvens gans Cristonyon. Ytho ny a yll perna cantolyow Asvens, mayth yw an dedhyow dhyrag Nadelyk nôtys war an tenewen ha pàn vo an gantol anowys hy yw consûmys bys in pympes dëdh warn ugans Kevardhu. Yma radn kefrÿs ow perna dedhyadoryon Asvens, may ma lies fenester bian inhans, saw y kelys adhelergh dhe dharas a basbord, hag y hyllyr egery an fenestry bys may dheffa Dëdh Nadelyk. In eglosyow y fÿdh settys in mes garlontow Asvens ‘Advent wreaths’ eus pymp cantol gwydnrudh ortans. Yma an cantolyow-na ow sygnyfia certan pobel a bris i’n istory dhyrag devedhyans Jesu Crist: rag ensampel Abraham, an profettys, Jowan Baptyst ha’n Werhes Ker Maria. Nyns yw an gantol in cres an arlont anowys bys in Nos Nadelyk, pàn vo solempnys carnacyon Crist. Asvens ytho yw termyn a gwaityans; res yw remember bytegyns na vÿdh Cristonyon ow cortos genesygeth Crist yn udnyk saw inwedh y secùnd devedhyans. Yth yw an govenek-na gwelys in lies hympna Asvens, rag ensampel: Â deus, â deus, Imanùel; daspren an prysner Israel, dyvrês hirethek trist a vêw hirneth ow cortos dos Mab Duw; Omlowenha, Imanùel a dheu dhis scon, a Israel. Yth esa Jowan Baptyst ow pesydhya pobel Israel in Dowr Jordan pàn veu govydnys orto pyw o va in gwiryoneth. Ev a worthebas: Me yw lev onen eus ow carma i’n gwylfos, ‘Gwrewgh compes fordhow an Arlùth,’ dell leverys Esay an profet. In gwir lowr a dyleryow in lyver Esay yw cresys dhe referrya dhe dhevedhyans Crist. Rag ensampel: An Arlùth y honen a vydn ry tôkyn dhywgh. Merowgh, maghteth a wra omdhon ha denethy mab, ha gelwel y hanow Imanùel. Hag in tyller aral Esay a lever: Ragon ny re beu genys flogh, dhyn ny mab yw rës; ha’n governans a vëdh wàr y dhywscoth, ha’y hanow a vëdh gelwys Consler Marthys, Duw Galosek, Tas Eternal, an Pensevyk a Gres. Esay y honen o profet in gwlascor Jûda in êthves ha’n seythves cansvledhen dhyrag Crist. An Assyryans a gonqwerryas Israel, hèn yw an wlascor dhe’n north a Jûda, hag y a gemeras hy fobel in kerdh in exîlyans. Ena in dadn aga mytern Sennacherib y a assaultyas pow Jûda pàn o Hezekia an mytern. An Assyryans a wrug kerhydna Jerùsalem saw an gorheas a fyllys, dre rêson a gleves ùncoth. Senacherib a dhewhelys tre dhe Assyrya. Esay, Hezekia ha pobel Jûda a ascrîbyas merkyl aga sawment dhe dhorn marthys Duw.