© 2026 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yma an ger medhec ‘medicus [doctor]’ in Gerva an Kernowek Coth. Pelha yma Lhuyd in y erva Latyn-Keltek ow ry medhek ‘chirurgeon’ hèn yw ‘surgeon’. Kynth yw an spellyans gans <e> i’n secùnd sylaben an form ûsys, yth yw <methak>, <methag> kefys inwedh. Kyn fia nebonen ow qwetyas an plûral nùmber *medhygyon, an udn liesek gwelys i’n tavas tradycyonal yw medhogyon in Bêwnans Ke. I’n textow Kernowek, dell yw ûsys, yth yw Duw pò Crist an medhek gornaturek. In Resurrexio Domini rag ensampel Tyber, an emprour Roman yw clâv ha dâ via ganso mar teffa Jesu rag y sawya; ytho i’n gwary ny a red: dhodho yma cleves brâs; ny gyv medhek a’n sawya ha pelha dhodho gwait may tanvenhy Crist bys in daras y jy dres pùb medhek dell yw flour. Yma govenek dhe glevyon in Bêwnans Meryasek fatell yll Meryasek aga yaghhe der y bejadow dhe Dhuw. An den dall a lever: Dall y feuv lies bledhen; medhek vÿth oll ny gefen a allho gul dym gweres. Pelha den aral in Bêwnans Meryasek, uthyk an cleves crohen wàr y fâss, a lever In Cambron me re glôwas yma prest unn medhek brâs ow sawya tus yn certan; me a vynn mos dhe veras gul gweres dymo mar mynn. In ken tyller i’n gwary Comes Glôbùs a lever: A Dhuw ass oma grêvys, rag na welaf tra i’n bÿs. Pandra dal oll ow rychys? Lêdyowgh vy dhe Veryasek; me re glôwas galosek y vos in y merclys; dhymmo mar mynn bos medhek, yn tâ y fÿdh rewardys. Hag yma Ke in Bêwnans Ke ow yaghhe den clâv; ev a lever: Jesu re bo dha vedhek a’n leper crev anhedhek. I’n homylys Tregear ny a red hebma adro dhe’n governour Cristyon: kepar ha medhek dâ, ev a dregh dhe ves esel a vo corrùptys in corf mab den rag na wrella corrùptya esyly glân erel. Yth yw medhek cynycus dres ehen in Bêwnans Meryasek. Yma Costentyn emprour clâv a dhysês uthyk crohen ha ny wor an doctours fatl’yllons y y sawya. Yma an medhek owth avowa yn pryveth na wor ev poynt in pana vaner a yll ev sawya cleves an emprour. Ena ev a lever: Bytyweth res yw bêwa, mar ny weres fâlsury, fycycen ny dheref nefra. Merkyowgh fatell usy ev ow kelwel y honen fysycyen kyns ès medhek. Y fug-remedy rag an emprour yw omwolhy in goos a vilyow flogh inocent. Kynth yw an flehes cùntellys, nyns yw Costentyn parys dh’aga ladha. Dre rêson a’y dregereth bytegyns, yma Duw worth y sawya der y bower ollgalosek.