© 2026 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
I’n Beybel hendas an Grêkys yw Javan (Iawân), peswora mab Jafet, mab Noy. Adhelergh dhe’n hanow Javan/Yawân yth eson ny ow qweles an wredhen kefys in Ionia, in emlow a Asya Vian, Tùrky hedhyw. A les ywa i’n gettesten-ma fatell usy an Tùrkys hedhyw i’n jëdh ow referrya dhe bow an Grêkys gans an hanow Yunanistan, le mayth yw Yunan dhe gelmy gans Yawan. Yma an Grêkys aga honen ow referrya dh’aga fow avell Ellas pò Ellada; hèn yw an hanow classycal. Aga thavas ytho yw Ellenika ‘Hellenic.’ Nyns o hedna an ûsadow i’n dedhyow coth. I’n dedhyow an empir Besontîn an Grêkys a wre referrya dhodhans aga honen avell Romaioi ‘Romans’, ha’ga thavas o Romaiká ‘Romayek’. An Romans i’n West a elwy an Grêkys Graeci. Dre rêson lies Grêk dhe vos tregys i’n Soth a Italy in dedhyow Empir an Romans in West, an Romans a wre referrya dhe’n partys Grêk a Italy avell Magna Graecia ‘Grêss Vrâs’. Kyn nag yw meur a’n tavas Grêk côwsys in Italy na felha, i’n nebes pendrevow may ma va ûsys whath, yma an gowsoryon ow kelwel aga thavas Griko; devedhys yw hedna dhyworth an hanow Latyn Graecus ‘Grêk, an tavas Grêk’. Yma pobel pow an Grêkys ha’ga thavas complys yn fenowgh i’n Kernowek, saw yth hevel nag o udn form a’n henwyn-na agries gans an gôwsoryon hengovek. Gesowgh ny lebmyn dhe veras orth an geryow in Kernowek tradycyonal rag ‘Greece,’ ‘Greek’ ha ‘Greek language.’ In y Erlyver Meur a’n vledhen dyw vil ha naw rag ‘Greece’ yma Dr Ken George ow comendya *Pow Grek; nyns eus dùstuny vÿth rag an hanow-na; pelha nyns yw otham anodho. Yma form warrantus kefys i’n textow. In Bêwnans Ke ny a red: Mytern Grêss ov i’m tour, Epystrofùs, body flour. Grêss, ytho yw an Kernowek ewn rag ‘Greece’. Pobel Grêss yw Grêkys, rag Tregear a scrif: Oecumeniùs, den auncyent in eglos an Grekys hag in ken tyller: yma va ow screfa: Ewsêbyùs Emissênùs, den auncyent adhia’n eglos a’n Grykys. Wàr an tenewen aral yma auctour Sacrament an Alter ow leverel: An Grêcyans yma ’kelwel Eucarystia. An Grêkys ragtho ev ytho yw Grêcyans. Tavas an Grêkys yw Greckyan gans Nicholas Boson, pàn scrif ev: an lies tavas pecar ha Greckyan, Hebran; saw Jowan Boson a lever I’n Tavas Grêca, Latyn ha’n Hebra, in Frynkek ha Kernowek deskys dâ. Wàr verr lavarow in Kernowek me a vydn leverel Grêss ‘Greece’, Grêk ‘a Greek’, an Grêkys ‘the Greeks’ ha Grêca ‘Greek, the Greek language’.