© 2026 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In Kernowek mars on ny whensys dhe leverel ‘better’ avell adverb, res yw leverel dhe well, rag exampyl me a gelm fast an losel may hallo pùb oll dhe well dodho ev ry strekesow (Passio Christi); A caffen neb a wodhya, y’n jevia gwereson may fe dhe well (Bêwnans Ke); rag may hallowgh ùndertondya an mater-ma dhe well ha dhe plainya, why a wra ùnderstondya nag o an hevelep a dhen haval dhe Dhuw in bodyly semblans (Tregear). Merkyowgh i’n tressa exampyl fatell yll bos ûsys an form gomparek a’n gnas-er pò ‘adjective’ a plain kefrÿs. Yth yw dhe voy ‘all the more, the more’ ûsys yn fenowgh inwedh, rag exampyl: rag henna neb a’m gwerthas meur dhe voy ev re pehas (Passio Christi); rag an pain eus dhodho gwrÿs, dhe voy yth yw lowenhÿs (Bêwnans Ke); dhe voy nefra me a’th cas, owtlayer fies a’th wlas (Bêwnans Meryasek); I’n Sownsek ny a lever, rag ensampel, ‘the less you spend, the more money remains in your account.’ In Kernowek ny a yll gwil lavarow gans dhe + gnas-er comparek sewys gans dhe + gnas-er comparek; ha res yw gorra an kensa verb i’n gîss sojeta pò ‘subjunctive’; rag ensampel: Dhe hirha a vo an rol, dhe pelha, why a wor oll, hy a vëdh prest ow redya (Bêwnans Meryasek); dhe belha ha dhe wiùsa a vo va ow mos in rag, dhe voy yma ow kelly y lavur (Tregear); dhe le inclynacyon a’n jeffa den dhe begh, dhe voy ha dhe vrâssa yw y begh, mar teu ha gul an dra (Tregear). In le an kensa dhe gans voy, y hyll bos ûsys seul gans trailyans medhel wàr y lergh, rag ensampel: Seul voy ancow a wrellowgh, dhe larchya praisys vedhowgh (Bêwnans Meryasek). Lebmyn dre rêson ny dhe wodhes an fordh gewar in Kernowek dhe wil lavarow a’n par-ma, gesowgh ny dhe assaya nebes anodhans: ‘The less money you spend, the more remains in your account’: Dhe le mona a wrylly spêna, dhe voy a wra remainya in dha acownt; ‘The higher you rise the harder you fall’ Dhe uhelha a wrylly ascendya, dhe galessa esta ow codha; ‘The more you know, the more you realise you don’t know’ Seul voy a vy ow codhvos, dhe voy esta ow convedhes na wodhesta.’ Hag otta dew lavar heb verb vÿth: The bigger the better’: Dhe vrâssa, dhe well ha ‘The more the merrier’ Dhe voy, dhe lowenha.