© 2026 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Boadicea yw an hanow kefys i’n penfentydnyow Latyn rag an vyternes Vrethonek Boudyca. Hy hanow yw Keltek pur hag y hyll ev bos styrys avell *Boudica ‘Victorious’; an versyon gorow o *Boudicos, form usy ow ry an hanow Kernowek Budhek, gwelys rag ensampel i’n tyller Budock, ogas dhe Arwednak. Boudyca o demedhys gans Prasùtagùs in kensa cansvledhen wosa genesygeth Cris; y feu dyw vyrgh genys dhodhans. Yth esa Prasùtagùs ow rêwlya randir vrâs in Ÿst-Anglia a’gan dedhyow ny avell kefrysyas anserhak a’n Romans. Pàn verwys Prasùtagùs, ev a asas y wlascor dh’y dhyw vyrgh ha dhe emprour Rom. Saw y wedhowes a veu scorjys ha’y vyrhes a veu defolys wàr arhadow an governour Roman, Catùs Decianùs. Pelha randir Prasùtagùs, côstys y bobel ev, an Icēni, a veu sêsys gans an Romans. Yth esa tireth an Icēni ow lêsa dres oll Norfolk ha Sùffolk agan dedhyow ny, ha dres radn a’n tylerow wàr aga oryon. Dre rêson a’n despît rÿs gans an Romans dhedhy, dh’y theylu ha dh’y fobel, Boudyca a rebellyas i’n vledhen try ugans. Kyns oll an rebels a assaultyas Camulodūnum (Colchester hedhyw), o colōnia rag soudoryon omdednys. Tempel Roman o byldys in Camulodūnum dhe’n emprour Clawdyùs, ha’n byldyans a gostyas showr a vona. Y fedha an soudoryon omdednys ow tyghtya pobel enesek an tyller in maner gruel. Army Boudyca o gwrÿs a’n Icēni hag a’ga hefrysysy an Trinovantes, ha warbarth y a nùmbras cans hag ugans mil dhen. Pàn wrug Boudyca dallath hy sordyans, nyns o lu Roman vÿth a ylly hy fetha. An rebels a gemeras Camulodūnum ha yn scon oll an Romans ino a veu ledhys. Governour Roman in Breten o Catus Decianus hag ev der y grefny o dhe vlâmya rag meschauns Camulodūnum. Ev a forsâkyas Breten ha mos dhe Gal (Frynk hedhyw). An rebels a wastyas Verùlamiùm (St Albans hedhyw) hag ena kerdhes warbydn Londiniùm (Loundres). Boudyca ha’y lu a’s kemeras; y a dormentyas ha ladha pùbonen esa inhy. An jeneral Roman Gaius Suetonius a gùntellas lu a dheg vil soudour. Moy o lu Boudyca saw codnek Suetonius a veu re dhâ rag army Boudyca ha’n Vretons a veu fethys. Pùbonen anodhans (benenes ha bestas comprehendys) a veu gorrys dhe’n mernans. In Pow an Sowson hedhyw yma rosweyth a drûlerhow hag a fordhow cul usy ow resek dhyworth Wiltshire dhe Norfolk. Hanow an rosweyth-na yw aswonys avell ‘Icknield Way’ hedhyw. An kensa mencyon anodho dhyworth an degves cansvledhen a’n gelow Iccenhilde weg ‘hens batel an Icēni’. Dell hevel yth o an Icknield Way an fordh may whre kerdhes luyow an Icēni, pobel Boudyca.