© 2026 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
In pluw Senar yma tyller gelwys Tredhewy; yth esa tregys ena benyn goth neb a’s teva hanow brâs rag hy sleyneth in nygromons. Yth esa hy hus, hy sonow ha’y gorhanow orth hy gwil chêson rag own dhe oll hy hentrevogyon. Saw nyns esa hy gour ty ow crejy poynt in hy fystry. I’n contrary part yth esa ev ow teclarya heb hedhy ev dhe vos dyscryjyk yn tien ow tùchya hy fowers gornaturek. Udn jëdh an gour, bohes y grejyans, a dheuth tre hag ev gwag. Ev a dhyscudhas er y wu nag o parys kydnyow vÿth ragtho ha lacka whath nag esa boos vÿth i’n chy. Ev o serrys brâs saw ny worthebys y wreg ma’s ‘Ny yllyn cafos boos in mes a’n veyn, a yllyn vy?’ An den coth a dheclaryas fatell wre y wreg sùffra yn poos mar ny wrussa hy provia kydnyow ragtho. Ha pelha, yn medh ev, an kydnyow-na ajy dhe hanter-our. I’n eur-na ev a vynsa cresy hy sleyneth hudol, hag ev a via gostyth dhedhy rag nefra. An nessa tre dhodhans o Porth Ia hag yth o hedna pymp mildir dhywortans; heb let an venyn a worras hy mantel adro dhedhy ha’y hûgh wàr hy fedn ha dyberth. Hy gour a veras orty dhyworth an daras arâg. Hy êth an bryn wàr nans bys i’n nans. Ena hy a settyas hy honen wàr an dor ha vanyshya. In hy le ev a welas scovarnak ow ponya in kerdh. Warlergh hanter-our y wreg a entras i’n chy ha gensy kig dâ hag avallow dowr parys dhe dhebry. Nyns esa an den in dowt na felha. Warlergh hedna ev a vêwas in own anedhy bys dëdh hy mernans. Pàn verwys an venyn y feu hy horf degys in geler gans whe den coth. Pàn esens y adro dhe hanter-fordh inter an chy ha’n eglos, scovarnak a spryngyas in bàn dhyworth amal an fordh ha lebmel dres an eler. An dhegoryon a gemeras scruth, gasa dhe’n eler codha wàr an dor ha ponya in kerdh. Y feu kefys whe den moy hag y a dherevys an corf ha procêdya tro ha’n eglos. Nyns êns y gyllys re bell pàn veu gwelys cath dhu a’y eseth wàr an eler. Arta y feu an eler forsâkys, saw wosa kescows pell lowr y feu acordys fatell wre whe den moy carya an venyn varow in hy geler hag y whre an prownter kerdhes dhyragthans. Pàn esa ev ow kerdhes in rag, ny cessyas ev bythqweth ow leverel an Pader. Pùptra a wharva yn tâ erna wrussons drehedhes yet an gorlan. Y feu gwelys an scovarnak arta ow sevel ryb an eler. Pàn wrug an Prownter dalleth leverel ‘Me yw an dasserghyans ha’n bêwnans’ an scovarnak a ùttras cry uhel dyowlak. I’n eur-na an scovarnak a veu gwrÿs hager-best dyfelebys du ha dystowgh mos mes a wel.