(558) 'Over' in Kernowek - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Y feu an adverb over in Kernowek benthygys dhyworth Sowsnek. Saw kyns ès y verkya ûsys gans geryow Kernowek, ny a yll gweles over in devnyth avell an kensa element i’n verbow neb a veu benthygys dhyworth Sowsnek, hèn yw in overcùmya hag oversettya. An kensa a’n re-na yw kebmyn lowr in Kernowek; rag yma va dhe vos nôtys in tredhek tyller i’n textow tradycyonal. Ot obma oll an examplys-na: mar qwreth y overcùmya, dhe Crist ny a vynn trailya — (ow côwsel a’n dhragon; Bêwnans Meryasek); gwren ny kemeres with ha’y avoydya, inwedh y overcùmya gans oll y trainys ha’y antylly (Tregear); Ev a promyssyas fatell vedha onen genys mes a’n stock ha’n has a Eva, a wre overcùmya agan escar ny an tebel-el (Tregear); agas escar an tebel-el, neb yw overcùmys dre Jesu Crist (Tregear); nyns yw ev lemmyn abyl dh’agan overcùmya ny, mar mynnyn ny sevel er y byn valyently i’n fedh a Crist (Tregear); an Eglos catholyk nefra ny vÿdh overcùmys gans errour (Tregear); ny veu pell wosa an prankys ma…na wrug Duw dynvyn y chif-apostyl Peder dhe Rom, neb a wrug confùndya Simon Magus ha’y overcùmya? (Tregear); hemma a via suffycyent lowr dhe overcùmya an re a vynna gul resystens (Tregear). Dell welsyn ny, an secùnd verb usy ow tallath gans over hag a veu benthygys dhyworth Sowsnek yw oversettya ‘conqwerrya, fetha’. Hèn yw gwelys in: Arthùr a vynn y vetya in hast ha’y oversettya (Bêwnans Ke). Yma over kefys inwedh avell rag-gorrans pò ‘prefix’ gans verbow teythiak Kernowek, rag ensampel, an verb overweles ‘to oversee’: Salamon, a veu dyskys dre an Spyrys Sans, ev a wrug overweles an dînyta, ha’n beauty a Sans Eglos (Tregear); dhe gafos an cûr ha dhe overweles ha governa y eglos bys gorfen an bÿs; (Tregear). Yth yw over gwelys kefrÿs avell rag-gorrans dhyrag an gnas-er verbek tevys ‘grown’ dhyworth tevy ‘to grow’ in overdevys ‘overgrown’. Yth yw try ensampel a hedna kefys i’n Creacyon an Bÿs: dyfelebys ov pòr veur hag overdevys gans blew (Creacyon an Bÿs); Why a’m gwel— overdevys yth oma warbarth gans blew (Creacyon an Bÿs); dyfelebys os ha cabm, overdevys oll gans henna yth os gans blew (Creacyon an Bÿs). Dell hevel yth esa Sowsnek over avell rag-gorrans in Kernowek termyn pòr hir, rag in Gerva an Kernowek Coth ny a gav ofergùgol ‘casula [chasuble] dhyworth <ofer> [‘over’] ha cùgol ‘cloak, garment’. In ofergùgol over yw spellys gans <f>, dell yw ûsys in Sowsnek Coth, saw res yw y bronowncya [v]. Wàr an dyweth yth yw an ger sempel Sowsnek over ûsys ganso y honen dhe styrya ‘exceedingly, very’ in: skians benyn yw brottel; ha me nag ov over sottel (Creacyon an Bÿs). Res yw avowa ytho fatell o an benthyk Sowsnek over ûsys in Kernowek rag termyn hir.