© 2026 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Y feu dyspûtyans Scrope gans Grôvenor câss laha ow tùchya herotry. An negys a wharva i’n vledhen tredhek eth deg naw, pàn veu dyscudhys fatell esa dew varhak dyffrans in servys an mytern, an Secùnd Rychard, ow ton an keth côta arvow. An varhogyon o Rychard Scrope, kensa Baron Bolton ha Syr Robert Grôvenor dhyworth Conteth Ker pò ‘Cheshire’. An scochon a vedha descrefys indelma Wàr scoos blou treuspren owrek, hèn yw dhe styrya wàr scochon blou band a owr dhyworth an gornel dhyhow avàn bys in goles cledh (dhyworth savla degor an arvow). Ny veu merkys aga bos owth ûsya an keth scoos rag yth o an dhew deylu tregys in partys dyvers a Bow an Sowson. Yth esa an lahys a herotry ow lettya dew dhen rag don an keth arvow. Rychard Scrope ytho a erviras dhe dhry Robert Grôvenor dhyrag an Gort a Jevalry, may halla bos determys pyw a via alowys dhe bêsya ow ton an arvow-na. Lies huny a ros dùstuny dhyrag an gort, ina mesk Geoffrey Chaucer.. An Gort a Jevalry a erviras in favour a Scrope ha’n nessa bledhen Rychard Mytern a affyrmyas an determyans-na. Y fedha res dhe deylu Grôvenor don an scoos blou gans treuspren ino saw pùptra ajy dhe amal owrek. Scrope bytegyns a wrug croffolas fatell o an scochon nowyth, hèn yw treuspren ajy dhe amal owrek, whath re haval dhe’n arvow gwredhek. An mytern a gonsydras an mater hag y feu kemerys dhyworth Grôvenor an gwir dhe dhon an arvow, kynth esa dyffrans ino. Rêwlys veu i’n eur-na y talvia Grôvenor cafos scochon nowyth yn tien; hèn o Scoos blou ha warnodho manal (pò ‘wheatsheaf’) owrek. Yth yw teylu Grôvenor hedhyw i’n jëdh Dûkys Westmynster hag ymowns y whath ow ton an scochon usy an manal ino. Ny wrussons ankevy an arvow kellys gansans bytegyns ha traweythyow yma esely a deylu Grôvenor gelwys gans an hanow bejyth Bendor ‘Treuspren owrek.’ Saw yma radn aral dhe’n whedhel-ma. Pàn vedha an qwestyon a’n scochon gwredhek dyspûtys, y feu dyscudhys fatell esa teylu in Kernow, gelwys Carminow, ow ton Scoos blou ha treuspren owrek warnodho. Saw determys veu gans an Gort a Jevalry nag o res dhe deylu Carminow chaunjya an côta arvow esens y owth ûsya. An rêson rag an ervirans-na o hebma: nyns o Kernow an keth gwlascor avell Pow an Sowson, hag ytho ny vedha teylu Carminow constrînys dhe adoptya arvow nowyth.