© 2026 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
I’n textow tradycyonal Kernowek devnyth a’n ger huny yw fest lymytys. Ot obma nebes examplys: shyndys veu dre goveytys; indella yw lies huny (Passyon agan Arlùth); tùllys yw lies huny der pÿth an bës yn certan (Bêwnans Meryasek); in agan mesk eredy dader dhe lies huny ev a wrug, dhe Jesu grâss (Bêwnans Meryasek); emprour wordhy, mab dhe’n vyternes Helen, neb yw penn oll y ehen, dell glôwas lies huny (Bêwnans Meryasek); pÿth yw an ethom dyn ny cafos lavur a’n par-na, abàn vynnyth pùb huny ladha? (Origo Mundi); my a’s gweres pùb huny (Origo Mundi); Duw a vercy dhe bùb huny sur yth ywa (Passio Christi); dres pùb huny pòr wir os jy sur benegys (Passio Christi); ha’y venneth dhywgh pùp huny (Resurrexio Domini); jentyl yw dhe pùb huny (Resurrexio Domini); lowena ha rielder hag onour brâs in pellder dhe’m arlùth dres pùb huny! (Bêwnans Ke); mar lenwys yw an bÿs lemmyn a sherewynsy mayth yw dyweth devedhys ino a gig pùb huny (Creacyon an Bÿs); Welcùm owgh, arlydhy mas, ha Duw re dhanvanna ras warnowgh in kettep huny! (Bêwnans Ke). Apert yw dhyworth an examplys-na nag yw huny ûsys ma’s wosa lies, pùb ha kettep yn udnyk. I’n gwetha prÿs yma certan Kernowegoryon ow comendya dhe gôwsoryon may whrellens istyna ûsyans an ger huny ha gwil devnyth anodho in kettestednow nag yw destys i’n tavas tradycyonal. I’n Gerlyver Meur a’n vledhen dyw vil ha naw yma Dr Ken George ow profya an lavar an huny rudh ‘the red one’ hag ev a lever: ‘Nyns yw lavarow avell an huny rudh destys i’n textow. Y yw istynans a’n gramer drës ajy gans Wella Brown wàr fùndyans an Bretonek.’ Saw revrons Dr George, nyns yw lavarow avell an huny rudh istynheans a’n gramer. Nyns yns y ma’s istynans a’n erva ‘an extension to the lexicon’. In Kernowek hengovek an ger huny yw morfêm strothys pò ‘bound morpheme’. Hèn yw dhe styrya nag usy an tavas tradycyonal ow ry cubmyas dhe huny omdhysqwedhes marnas warlergh an gnas-eryow lies, pùb ha kettep. Mar teun ny hag alowa huny dhe obery avell morfêm frank, hèn yw in kettestednow erel yn tien, yth eson ny ow qwil rêwl nowyth rag an tavas dasserhys nag yw lel dhe’n tavas tradycyonal. An rêwl nowyth ytho yw heb jùstyfians. Yma an Dasserghyans Kernowek ow whelas gwil dhe dhasvêwa tavas istorek Kernow. Mar teun ny hag addya rêwlys nowyth dhedhy, nyns eson ny ow tasserhy tavas; yth eson ny worth hy das-formya.