(562) Arlodhes Godyva - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Arlodhes Godyva o benyn nôbyl Anglô-Saxon a’n unegves cansvledhen, hèn yw dhe styrya a’n bledhydnyow nebes dhyrag goreskyn an Normans. Hy hanow Sowsnek o Godgyfu ‘ro dhyworth Duw’ saw dell yw ûsys, hy yw gelwys Godyva, an form Latyn. Hy gour o Leofryk, yùrl Mercya, hag y a’s teva naw flogh warbarth. An kespar yw complys in lies dogven a’n dedhyow-na avell scodhoryon larj a dhyvers eglosyow ha managhtiow. An whedhel gwelha aswonys adro dhe Godyva yw hebma. Yth esa hy gour ty ow settya tollow poos orth pobel Coventry, cyta in cres Pow an Sowson hag ytho in Mercya. Godyva a’n pesys fest crev dhe lehe an tollow saw Leofryk a’s sconyas. Saw wàr an dyweth an yùrl a gollas y hirberthyans gensy hag ev a leverys na vydna ev lehe an tollow erna wrella y wre’ty marhogeth dre strêtys Coventry ha hy stryppys yn noth; ny via tra vÿth moy ow keles hy horf noth ès hy blew hir. Warbydn waityans hy gour ty Godyva a agrias dhe wil indelha, saw hy a wrug dheclarya dhyrag dorn may whrella oll cytysans refrainya dhyworth meras orty, saw gortos wàr jy in aga threven. Herwyth an whedhel trehor gelwys Tobmas a dorras arhadow an arlodhes hag a wrug hy aspias dre doll gwrÿs ganso in fos y jy. Dre rêson a’y gamhenseth, herwyth an henwhedhel, Tobmas a veu gweskys dall. An whedhel-na yw sordyans an lavar Sowsnek ‘peeping Tom’ (Tobm lagator). Ny vedha toll vÿth reqwîrys in Coventry i’n dedhyow-na ma’s wàr vergh yn udnyk. Martesen, herwyth certan screforyon, nag esa Godyva ow qwetyas ma’s may fe an doll-na lyftys. Ow tùchya an whedhel a’y marhogeth yn noth, bytegyns, nyns ywa gwirhaval poynt. Nyns yw hy marhogeth complys ma’s bys i’n tredhegves cansvledhen, adro dhe dhew cans bledhen wosa mernans Godyva. Teg yw dowtya an whedhel, spessly pàn yw Godyva complys rag hy larjes in dogvednow kevoos gensy. Nyns yw an whedhel gwirhaval rag ken rêson. Godyva o demedhys dhe Leofryk, den nôbyl, hag y a’s teva meur a flehes warbarth. Mar teffa Leofryk hag acordya dh’y wre’ty omdhysqwedhes in maner mar dhyflas dhyrag an bobel, ny vynsa hedna ma’s dystrôwy y hanow dâ. An versyon cotha a’n whedhel a lever fatell wrug Godyva marhogeth dre varhas Coventry dhyworth udn tenewen dh’y gela, ha nag esa gensy ma’s dew varhak. Certan istoryans re verkyas elementys a solempnytas pagan i’n whedhel; hèn yw pàn vedha benyn yonk, Myternes Mê, ledys dhe wedhen Cofa, rag welcùbma an gwaynten. Cofa dre lycklod o perhen an dre i’n dedhyow coth. Gwedhen Cofa a ros y hanow dhe Coventry, hèn yw Cofan+treo in Sowsnek Coth . Wàr neb cor nyns yw marhogeth Arlodhes Godyva lyckly dhe vos gwir.