© 2026 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Tardhans an ger Sowsnek ‘influence’ yw a les. Yma an hanow ow tos dhyworth influentia in Latyn an Osow Cres. Term dhyworth sterdhewynieth yw influentia, usy ow referrya dhe’n gallos dywel dhyworth tyleryow an ster wàr omdhegyans mab den poken wàr y dhestnans. Ow tùchya gwredhyow an hanow, influentia yw growndys wàr an verb Latyn influere ‘lenwel, frôsa aberth.’ I’m gerlyver Sowsnek-Kernowek me a gomendyas avell trailyans Kernowek rag ‘influence’ an ger nowyth-desmygys *awedhya, verb byldys wàr an stock aweth ‘watercourse, stream.’ Res yw avowa bytegyns nag yw aweth destys ma’s in nebes henwyn tyleryow diantel; saw y hyller comparya aweddwr ‘running water’ in Kembrek. An ger Kembrek rag ‘influence’ yw dylanwad; yma hedna ow tos dhyworth an verb Kembrek dylenwi ‘to replenish, to saturate’. Yma gerlyver wàr lînen an Academy Kernowek ow profya dew drailyans rag ‘influence’: awedhyans dhyworthyf vy ha delanwes benthygys dhyworth dylanwad in Kembrek. Mars eson ny ow remainya gans an verb awedhya ‘to influence’ ha gans an hanow awedhyans ‘influence’, ena ny a vydn cafos awedhyansus ‘influential’; in sted a hedna heb mar ny a yll ûsya a bris; meur y roweth pò neb tra kepar. Mars on ny whensys dhe leverel ‘influencer on social media’ ny a lever awedhyor wàr vainys cowethasek pò moy lyckly martesen awedhyores wàr vainys cowethasek. Yma ger aral in Sowsnek eus colm dhodho gans ‘influence’, hèn yw influenza. Influenza yw an form Italyan a influentia in Latyn. Dhyrag an nawnjegves cansvledhen, kyns ès bos dyscudhys an oberyans a egydnow pò ‘germs’ wàr gorf mab den, y fedha clevejow ascrîbys yn fenowgh dhe’n ster. In Italy i’n êtegves cansvledhen y feu desmygys an lavar influenza di catarro ‘awedhyans pûr; influence of catarrh’. Y fedha an lavar-na ûsys rag descrefa an tardhans a glevejow plagus pò ‘epidemic outbreaks’. Y feu an lavar cot’hës dhe influenza; ena y feu va adoptys in Sowsnek rag an kensa prÿs in seytek peswar deg try. Yma an ger anwos ‘cold (avell cleves)’ kefys i’n textow. Rag ensampel Rag fowt gwest ha goscotter namna vyrwyn rag anwos (Origo Mundi); rag ewn anwos ny glêwaf yêynder dhe’m troos (Passio Christi). Heb mar anwos in Kernowek yw an keth ger avell annwyd ‘cold’ in Kembrek. Rag goos nessa annwyd in Kembrek, yma Lhuyd ow ry anês in Kernowek, dell hevel, form moy adhewedhes a anwos. Wàr fùndacyon anwos hag anês William Morris i’n vledhen nawnjek naw deg pymp a wrug bathy an ger nowyth Kernowek anwêsva ‘influenza’.