© 2026 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yth yw an gnas-er pò ‘adjective’ Ebrow ‘Hebrew’ kefys in Kernowek i’n gwary Passio Christi, pàn usy Crist owth entra in Jerùsalem. An tressa maw a lever : Flehes Ebrow, deun in unn rew scon heb lettya erbynn Jesu, neb yw gwirDhuw, ow tos dhe’n dre. Y hyll an ger ‘Hebrew’ in Sowsnsek referrya inwedh dhe davas pobel Israel i’n dedhyow Davyth ha Salamon. Warlergh bos exîlys dhe Babylon bytegyns an Ebrowyon pò ‘Hebrews’ a dhalathas côwsel Aramek pò ‘Aramaic’ insted a’ga yêth istorek Ebrow. Y a bêsyas owth ûsya Ebrow bytegyns avell tavas solempnyta, rag yth o an Testament Coth screfys in Ebrow yn tien ogasty. In Israel hedhyw an hanow ûsys rag Ebrow, coth ha modern kefrÿs, yw Ivrît hag i’n Beybel esel a bobel Israel yw gelwys Ivrî. Dell hevel y hyll Ivrî bos kelmys gans an wredhen Ebrow ’avar ‘ev êth dres, ev a bassyas.’ Dell hevel yma Ivrî ow referrya dhe nebonen a dheuth dhe’n Tir Sans in udn bassya dres Dowr Ewfrâtês. In Grêca Ebrow yw Hebraios, hag in Latyn Hebraeus. I’n Sowsnek Cres Hebraeus a dhysplêgyas avell Hebrew. In Kernowek Adhewedhes tavas an Testament Coth yw gelwys Hebran gans Nicholas Boson, rag ev a scrif: mar veur godhvos a’n lies tavas pecar ha dha Greckian, Hebran. Saw Jowan Boson a scrif, ow tùchya Jowan Keigwin: I’n tavas Grêca, Latyn ha’n Hebra, in Frenkek ha Kernowek deskys dâ. I’n Testament Nowyth yma lyver gelwys ‘An epystyl dhe’n Ebrowyon’. I’n lies dornscrif yth ywa ascrîbys dhe Sen Powl, saw nyns yw tavaseth an epystyl haval dhe screfa Powl. Jowan Tregear a gresy fatell o Sen Powl an auctour rag ev a scrif: Yma Sen Powl i’n secùnd chaptra dhe’n Hebrûs ow leverel…neb a wrug benega ha’n re-na neb yw benegys, yth yns oll onen. Yma certan scoloryon hedhyw owth ascrîbya an epystyl dhe Barnabas, coweth Sen Powl. Yth yw an Epystyl dhe’n Ebrowyon onen a’n lyfryow moyha helavar in oll an Testament Nowyth. Gwell yw an Grêca i’n epystyl ès Grêca Sen Powl, kynth eus hevelepter intredhans. Dre lycklod y feu an epystyl screfys kyns ès sacryfîcys an templa in Jerùsalem dhe cessya i’n vledhen Agan Arlùth deg ha tryugans. Dell hevel y feu an epystyl intendys rag Cristonyon Yêdhow in Jerùsalem, esa in dedhyow avarr an eglos Cristyon in dadn iniadow crev dhe forsâkya aga crejyans in Crist ha dhe jùnya orth Yêdhowieth an rabys. Yma an Gerlyver Meur a dhyw vil ha naw ow leverel (in Sowsnek): ‘Ebrowyon…an lyver i’n Testament Coth.’ Dell welsyn ny avàn, nyns yw an Epystyl dhe’n Ebrowyon lyver i’n Testament Coth adar lyver a bris i’n Testament Nowyth. An menegyans-na i’n Gerlyver Meur yw errour bian gocky.