© 2026 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Magnùs Maxymùs a veu genys in Hispania (Spayn) hag a veu comondyas a lyjyons Roman i’n Britannia. In gwaynten an vledhen try eth deg try y soudoryon a’n declaryas emprour Roman i’n West. Dystowgh ev êth dres an Chanel dhe jalynjya y gestrîvyor Gracyanùs. Maxymùs a spêdyas dhe wainya soudoryon Gracyanùs dh’y denewen y honen ha Gracyanùs a fias dhe’n fo. Maxymùs a wrug y jif-plâss a Augusta Treverorum (Trier hedhyw in Jermany). Maximùs a wrug omlath inwedh gans Theodôsyùs an emprour i’n Ÿst ha gans an secùnd Valentynyan, neb a veu kesemprour gans Gracyanùs. I’n vledhen try hans eth deg eth gwerryans a dardhas inter Maxymùs ha Theodôsyùs. Y feu batellys jùnys intredhans in Siscia hag Pola (Sisak ha Pùla hedhyw in Croâcya) ha Maximùs a veu fethys inhans. Ev a veu kemerys prysner ha ledhys. Saw ger dâ Maxymùs a devys in mesk Keltyon Breten Veur. Kyns ès ev dhe forsâkya Breten dhe viajya dhe’n Brâstir rag chalynjya Gracyanùs, yth yw leverys fatell asas ev arlottes an enys in dêwla chyftens an Vrethonyon. Pelha pàn wrug ev cafos an empîr ragtho y honen, nyns o va whensys dhe dhanvon y soudoryon wàr dhelergh dhe Vreten. In le a hedna ev a ros dhodhans tiryow i’n North-West a Gal, ha hèn o dallath an Vrethonyon in Breten Vian. In Kembrek Maxymùs o aswonys avell Macsen Wledic ‘Maxymùs Chyften’. Crejyans a devys in bàn, mar avarr avell an nawves cansvledhen martesen, fatell o Macsen hendas a deyluyow rial in Kembra, hèn yw dhe styrya in Gwynedd, Dyfed ha Gwent. Yma dew versyon a’n grejyans-na kefys: onen in istory Jeffry Menow ha’y gela i’n whedhel Kembrek, Breuddwyd Macsen Wledic pò Hunros Macsen Chyften. An gwiryoneth a veu styrys der an secùnd whedhel-ma indelma. Kynth êth Macsen dhe’n Brâstir rag may halla ev sêsya an empîr dhyworth Gracyanùs, ev a dhewhelys hag a dhemedhas pensevyges Elen, myrgh Euddaf (Octavius), mytern Segontium (Caernarfon hedhyw). Teyluyow riel dyvers yw soposys dhe dherevel dhyworth an kespar-na. Dre lycklod Elen o duwes in gwiryoneth ha’n whedhel a’ga maryach a veu desmygys dhe ry aghscrif istorek dhe’n Gembrion. A les dhyn ny yw hebma: Macsen yw person i’n gwary Kernowek Bêwnans Meryasek, le may ma va gelwys Massen. I’n gwary yth yw Massen Cristyon stordy hag yma va owth omlath gans Turont pagan. Yma i’n wolok-na dasson martesen a Maxymùs ow mos dhe’n Brâstir rag omlath gans Gracyanùs pagan.