(571) Palm palv leuv - lovinglivingcornish

Clyckya obma ha goslowes / Click here to listen

Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

I’n textow Kernowek yma an ger palm ‘palm tree, palm branch’ gwelys moy ès unweyth, rag ensampel: palm ha flourys kekyfrÿs er y bynn degys a veu (Passyon agan Arlùth); palm ha bayes, byxyn, erbys genef yma (Passio Christi). Yma an ger palmor ‘palmer’ gwelys kefrÿs, saw in form liesek: Â, dres pow sur palmoryon y a vÿdh meurwowygyon (Resurrexio Domini). Palmor yw prieryn neb a viajyas dhe’n Tir Sans hag a dhros tre ganso branch a’n palmys esa ow tevy adro dhe Jerùsalem. An ger palm complys namnygen, yma hedna ow tos dhyworth Latyn palma, ger usy ow styrya wosatallath ‘torr an dorn, palm of the hand.’ An palm ‘palm tree’ a veu gelwys indella drefen bos an wedhen gans y scorednow ow cregy wàr nans haval dhe dhorn nebonen ha’y vesias poyntys tro ha’n dor. Dell usy ow wharvos, yma an ger palv ‘torr an dorn’ kefys in Kernowek, hèn yw in Gerva an Kernowek Coth. Palv yw an keth ger avell palm ‘palm, palm tree’ saw palv a dheuth aberth i’n Kernowek yn tydro dhyworth Latyn. An ger palm wàr an tenewen aral yw an keth ger Latyn saw benthygys dre Sowsnek Cres ha Frynkek Coth. A les ywa inwedh fatell usy ger genesyk in Kernowek neb a’n jeves an keth devedhyans avell palma in Latyn. An ger-na in Kernowek yw leuv ‘hand’. I’n tavosow Keltek yma an kesson /p/ kellys yn tien. Ytho an ragform *palma a dhysplêgyas heb /p/ in Keltek hag a ros lámh ‘hand’ in Godhalek, llaw ‘hand’ in Kembrek ha leuv in Kernowek. Nyns yw kebmyn an nùmber udnyk leuv in Kernowek; saw ny a’n cav, rag ensampel, in Glân ev re gollas an plâss a’m leuv dhyhow (Origo Mundi) ha nefra ny vynnaf cryjy…erna hyndlyf y golon gans ow leuv dre y woly (Resurrexio Domini). Saw yma an ger leuv i’n form dhewek pò ‘dual’ dêwla ‘two hands, hands’ kefys yn fenowgh i’n tavas tradycyonal, spessly i’n lavar treys ha dêwla ‘feet and hands.’ In Kernowek dell yw ûsys, bytegyns , yma an ger dorn ow kemeres le an form udnyk leuv; rag ensampel: me a gergh dowr dhis wharê; otta ow fycher gene’ in ow dorn. Pelha yma Tregear owth ûsya yn fenowgh an lavar dhyrag dorn ‘before hand’ rag ensampel: me a leverys dhywgh dhyrag dorn ha Rag henna, ow cothmans, dre reson y bosowgh gwarnys dhyrag dorn, bedhowgh war. Styr gwredhek dorn heb mar yw ‘fist’ ; hag yma an verb dorna, gwrÿs warnodho, ow sygnyfia ‘to punch’. Yma an styr-na gwelys i’n textow: rag ensampel in pòr ankensy gans dornow rewgh boxesow truesy (Passio Christi) ha me a’n dorn gans ow dornow may clamderha rag ewn euth (Bêwnans Ke).