© 2026 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Sens gwredhek an ger nyja, in Kernowek yw ‘to swim, to float’ hag in gwir yma Lhuyd ow styrya nyja avell ‘to swim’ in dew dyller in Archæologia Britannica. Ny a gav ensampel dâ a’n sens ‘to swim, to float’ kefrÿs in Origo Mundi. Orth dallath an lyw teylu Noy i’n gorhal a wel aga bos in cres strêmys brâs. Noy, meur y fedh in Duw, a lever: Dre grâss an nev agan Tas, ny a’s feth, kyn fo meur fell; agan gorhel re nyjyas; re’n sawyo Arlùth uhel. Yma re nyjas ena ow mênya ‘has floated’, hèn yw, ‘na veu budhys’. Dre vrâs bytegyns yma an ger Kernowek nyja ow styrya ‘to fly’ kyns ès ‘to swim, to float’. Ot obma nebes examplys: colom wheg glas hy lagas, kê, nyj a-ugh lies pow (Origo Mundi); nyj in kerdh lemmyn ha mir tireth mar kyll bos kevys (Creacyon an Bÿs). Hag in Resurrexio Domini onen a’n soudoryon danvenys dhe drôvya corf ledrys Crist, a dherif dh’y gothmans na yllons gwetyas cafos an corf, drefen Crist dhe vos dasserhys. Ev a lever: Me a’n gwelas ow nyja, ganso meur a gowetha ha gwynn o aga dyllas. In y drailyans a Jenesys Jowan Keigwin a scrif: ha an edhyn eus o’ nyja dres an nor alês in ebron nev. Jowan Boson a scrif adro dhe vernans Keigwin: Gen oll an gormola brâs ’veu dodha, gerys yw ny, ha [ev] nyjys awartha. Yma nyjys awartha ow styrya ‘flown on high’. Cler yw dhyworth oll an samplys-ma fatell yll nyja in Kernowek mênya ‘to swim, to float’ ha ‘to fly’ kefrÿs. Apert yw inwedh fatell yw nyja in Kernowek goos nessa an verb Bretonek nijal ‘to fly.’ Pelha carr-nij ‘flying-car’ rag ensampel, yw onen a’n geryow Bretonek rag ‘aeroplane’. An ger Kembrek rag ‘to swim’ wàr an tenewen aral yw nofio. Saw herwyth Geriadur Prifysgol Cymru yma nofio ow styrya ‘to swim, to float’ ha ‘to fly’ kefrÿs. Dell hevel nyns o Nance contentys gans styr tyckly an ger Kernowek nyja ‘to swim, to fly’. Rag hedna ev a dhros aberth in Kernowek an ger nowyth *neuvya ‘to swim’, growndys wàr nofio ‘to swim’ in Kembrek ha neuial ‘to swim’ in Bretonek. Trueth yw gweles fatell usy gerlyver wàr linen an Academy Kernowek ow comendya *neuvya avell an ger udnyk rag ‘to swim’. Dell hevel yma an ger nyja in Kernowek tradycyonal ow mênya ‘to move through air or water,’ hag ytho ‘to fly’ ha ‘to swim.’ Nyns eus otham vÿth in Kernowek ytho a’n ger desmygys *neuvya.