© 2026 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yth yw Bethlem tre in Jûdy .Dell hevel yma an hanow Ebrow Bethlehem ow mênya ‘Chy bara’, saw moy lyckly yw fatell o styr gwredhek an dre Chy Lahmu; Lahmu o duw Semytek an froothuster pò ‘fertility’. Yth yw Bethlem complys i’n Beybel rag an kensa prÿs in Jenesys avell an tyller may feu encledhys Rahel, gwre’ty Jacob. Yth ywa kefrÿs an tyller may whrug Rûth tyskedna in gwelyow Boaz. Bethlem inwedh yw tyller genesygeth Jesse ha’y vab Davyth. Pelha in Bethlem Samùel a wrug ùntya Davyth avell mytern Mebyon Israel. Yth yw Bethlem complys moy ès unweyth i’n textow Kernowek, hag yma an hanow ow tysqwedhes dyw form dhyffrans. An form in Kernowek Cres yw Bethlem, i’n examplys-ma: rag y fëdh mab in Bethlem genys a dhaspen an bÿs (Origo Mundi); pòr wir ev a veu genys in Bethlem Jûdy (Passio Christi) ha Dhe dhyspûtya worth Jesu a lever y vos Mab Duw a veu genys in Bethlem (Passio Christi). I’n termyn a’n Kernowek Dewedhes Wella Rowe a elow an keth tyller Bethalem. Ot obma an examplys in mes a drailyans Rowe a awayl Sen Mathew: Lebmyn pà veu Jesus genys in Bethalem a Jûdea in dedhyow Herod an Mytern, y whrug dos tus vur dhor’ an Ëst dha Jerùsalem; Ha anjy a lavaras dhodha: In Bethalem a Jûdea rag indelma mayth ywa screfys gen an prophet; Ha che Bethalem in Pow Jûda nag os an byhatna in mesk materneth Jûda rag in mes a che y whra dos mytern rag rowtya dha bobel Israel. Yma an Gerlyver Meur a’n vledhen dyw vil ha naw ow ry Bethlehem avell an hanow Kernowek. Pelha an gerlyver a lever fatell yw res consydra Bethlem ha Bethalem dhe vos formys ‘istorek’ yn udnyk. Auctour an gerlyver a lever inwedh fatell yw Bethlehem comendys avell an form gompes in Kernowek rag ‘ûsyans modern’. Res yw dhybm avowa na worama ùnderstondya yn tâ geryow an Gerlyver Meur obma. Yth hevel dhybm dyrêson declarya henwyn destys i’n tavas tradycyonal dhe vos ‘istorek’. Yma an dasserghyans Kernowek ow whelas gwil dhe’n tavas Kernowek dasvêwa—hèn yw tavas a verwys avell tavas pobel orth dyweth an êtegves cansvledhen. Rag hedna yth yw ‘istorek’ oll an tavas, henwyn tyleryow comprehendys. Ha wàr neb cor nyns usy an Gerlyver Meur ow sconya dhe ry dhe’n redyor lies hanow tyller destys i’n textow in aga form istorek, rag ensampel, Almayn ‘Germany’, Bitini ‘Bithynia’, Kreth ‘Crete’, Lybi ‘Libya’, Norgagh ‘Norway’, hag erel.