© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time. 

Henry Jenner a veu genys in cres an nawnjegves cansvledhen in Pluw Golom, mayth o cûrât y das in Eglos an bluw. Ena y das a gafas pluw in Kynt ha Jenner ha’n teylu a asas Kernow. Wosa cafos y adhyscans in scol in Essex, Jenner a veu gwrës scrifwas i’n Gort Uhel in Loundres. Dyw vledhen moy adhewedhes ev a gafas soodh in Asran an Dornscrifow Coth i’n Hendrajy Bretednek. Pàn esa ev ena ev a dhyscudhas wàr geyn chartour dhyworth Eglos Helans neb dew ugans lînen a Gernowek. In mil naw cans seyth deg pymp Prownter Lulyn, an Revront Lach-Szyrma, o an tavas Kernowek a les dhodho a screfas dhe Jenner. An dhew dhen a viajyas adro in west a Gernow warbarth ow whelas pobel goth o geryow a’n tavas tradycyonal remembrys gansans. Y feu frûtys an whythransow-na dyllys gans Jenner i’n nessa bledhen. I’n kettermyn an British Archaeological Association a gùntellas kescùssulyans adro dhe Gernow in Bosvena. Jenner a redyas paper ena adro dhe ‘istory ha lien an tavas Kernowek.’ Wosa hedna y teuth spâss a ugans bledhen pàn esa Jenner ow cul taclow erel. Saw in secùnd bledhen an ugansves cansvledhen Jenner ha nebes tus erel a fùndyas an Gowethas Kelto-Kernûak ha Jenner o sodhak an gowethas rag an tavas. Dyw vledhen wosa hedna Jenner a veu gwrës bardh a Orseth Breten Vian hag a gemeras Gwaz Mikael avell hanow bardhek. Jenner a ros areth in Kernowek dhe’n Vretonyon wàr an ocasyon-na hag ev a gresy y hyllens convedhes an radn vrâssa a’y eryow. I’n vledhen mil naw cans ha peswar Jenner a dhyllas y dhornlyver A Handbook of the Cornish Language. Gwir yw leverel fatell dhalathas an lyver-na an Dasserghyans Kernowek. Rag an kensa prës y hylly pobel desky an tavas dhe screfa ha redya ha dhe gôwsel inwedh martesen. I’n vledhen mil naw cans naw Jenner a omdednas dhyworth y ober i’n Hendrajy Bretednek hag a dheuth dhe drega in West a Gernow. Alena rag Jenner a sacras oll y dermyn dhe’n tavas Kernowek ha dhe wonesygeth Kernow. I’n vledhen mil naw cans dew dheg eth, in mis Est eth person dhyworth Kernow a veu recêvys avell berdh a Orseth Kembra. In mis Gwydngala an keth bledhen an eth person-na a dheuth warbarth avell berdh a Orseth Kernow i’n Woon Boscawen ogas dhe Eglos Beryan. Hedna a veu an kensa prës may feu sensys Gorseth Kernow. Henry Jenner a veu an kensa Bardh Meur in dadn an hanow bardhek Gwas Myhal, trailyans Kernowek a’y hanow in Gorseth Breten Vian.