(64) Nance 2


© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Ny wrug Nance dallath desky Kernowek erna veu va moy ès deg warn ugans bloodh ha nyns o va yethor herwyth dyscans. Nyns yw marth ytho bos nebes errours in Kernowek Udnys. I’n kensa le ny ylly Nance decernya inter map ha mab, tek ha teg, gwak ha gwag hag erel. Pelha ny wre ev dyffrans vëth in y spellyans inter an geryow gwëdh ‘trees’, gwaith ‘work’, gweyth ‘time occasion’ ha gwith ‘keeping’. Yth hevel inwedh na wodhya ev bos dyffrans inter an vogalen pò ‘vowel’ in deus ‘come!’ hag a dus ‘O men’. Dre rêson Nance dhe vos mar gemerys gans Kernowek an Osow Cres, ny wre va alowa taclow in mes a dextow moy adhewedhes, rag ensampel gansans rag gansa, dhedhans rag dhedha  pedn ha lebmel rag pen ha lemmel. Problem brâs aral gans Kernowek Udnys o purieth pò ‘purism’ Nance. Gwell o ganso pùpprës an ger Keltek, warlergh y dybyans ev, ès an ger kefys i’n textow, mars o cler an ger ewn dhe dhos dhyworth Sowsnek. Y whre Nance ûsya an ger arhans rag mona, saw i’n textow hengovek arhans yw ‘silver’ yn udnyk. An Kernowek ewn rag ‘money’ yw mona. Gwell o gans Nance bùsh a eryow nag yw kefys in Kernowek Cres, rag ensampel blejen, ‘flower,’ comolen ‘cloud’, avon ‘river’, enep ‘face’, tron ‘nose’ ha blasa ‘to taste’. An geryow kefys yw flour, cloud, ryver, fâss, frigow ha tâstya. Rag ‘public house’ ha ‘shop’ Nance a ûsya dewotty ha gwerthjygeryow a wrug ev desmygy y honen. An geryow kefys yw tavern ha shoppa. An problem brâssa gans Kernowek Udnys o hebma: warlergh mernans Jenner, Nance y honen oll o hùmbrynkyas an dasserghyans ha res o dhe bùbonen acordya ganso. Y gesoberor moyha skentyl o Caradar. Caradar o yethor a’y alow, ev a wodhya Kembrek fest dâ ha Manowek kefrës, saw res o dhodho agria gans Mordon pàn esa dyffrans vëth intredhans. Yth o Kernowek Udnys mar goth y semlant, nag o va êsy dhe dhesky saw cales’ha whath o va dhe gôwsel. Scoler dâ o Nance ha dour y wythres, saw res yw dhyn avowa fatell wrug y arlottes wàr an dasserghyans dres deg warn ugans bledhen lettya an tavas kyns ès y avauncya.