© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Pàn dhyllas Nance y erlyver brâs Sowsnek-Kernowek in mil naw cans pymp deg dew, ev a sacras an lyver dhe gov Caradar, a verwys dyw vledhen dhyrag hedna. In y sacrans Nance a elow Caradar ‘ow hesoberor skentyl dres lies bledhen.’ Kynth eus nebes a’n gwiryoneth in lavar-na, yn pryveth ny wre Nance ha Caradar acordya re dhâ. An dhew dhen a gesobery yn tâ wostallath, saw pàn esa Nance ow lavurya wàr an gerlyver brâs Kernowek-Sowsnek dyllys in mil naw cans try deg eth, ny vedha Caradar pës dâ ganso màn. Mordon a besys Caradar dhe sevel orth dylla gerva got Kernowek-Sowsnek o gorrys warbarth ganso hag avell rêson ev a leverys na alsa ev y honen gwertha meur o gopiow a’y erlyver brâs, a pe gerva Caradar dhe gafos solabrës. Caradar a screfas dhe gothman in Kernowek adro dhe Nance: Nyns yw Mordon ma’s corsen ow crena i’n gwyns. Gwann yw y gnas—kepar ha benyn goth kyns ès den. In lyther aral ev a jùjyas Nance yn lybm indelma: A pe va contentys dhe ry dhyn gerlyver ewn a wrussa dysqwedhes an tavas poran kepar dell o va, ny vynsen vy croffolas poynt. Saw yma Nance ow mos fest pelha ages hedna. Yma va owth assaya neb tra na yll bos gwrës marnas gans yethor deskys, ha’n dra-na yw dasterevyans. Yth yw radn a formys dasterevys Mordon kepar ha taclow gwrës gans flogh. In lyther aral whath Caradar a screfas: Nyns yw Mordon den êsy dhe wil gweres dhodho. Ev re beu an udn auctoryta ow tùchya an tavas dhia bàn verwys Jenner. Martesen ytho y hyll bos gyvys dhodho ev dhe gresy mar ny yll ev assoylya problem, ena na yll den vëth y assoylya. Apert yw fatell o whensys Mordon pùpprës dhe wil mêstry ha rêwlya pùbonen aral in maters ow longya dhe’n tavas Kernowek. Yth esa rêson rag hedna. Nyns o Mordon certan anodho y honen. Nyns o va deskys in tavosow ha ny wodhya ev nameur a’n sciens anodhans. Wàr an tenewen aral Caradar a wainyas gradh a’n class uhella in Latyn ha Grêk in Kergraunt, ev a wodhya Kembrek pòr dhâ hag yth esa ev ow tesky tavosow arnowyth dres lies bledhen. Yth hevel fatell esa Mordon ow perthy own a skentoleth Caradar hag envy inwedh a’y deythy i’n tavas. Trueth yw na wrug Mordon goslowes moy orth Caradar. Mar teffa ev ha gwil indella, martesen ny via mar lies gwander in Kernowek Udnys.