© 2017 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Mordon (Morton Nance) a verwys in mil naw cans pymp deg naw ha’y dyller avell Bardh Meur a veu kemerys gans Talek (E.G.R. Hooper). Talek a veu genys in Breanek in mil naw cans ha whegh. Ev a gafas y dhyscans avell losowor in Lowarthow Kew in Loundres. Ev a veu degemerys aberth in Gorseth Kernow pàn nag o va mas whegh warn ugans bloodh. Ev o cothman brâs dhe Garadar ha Caradar a leverys meur a daclow wherow ow tùchya Mordon in lytherow a screfas ev dhe Dalek, lytherow yw gwethys lebmyn in mesk covscrîvyow Gorseth Kernow. I’n bledhydnyow warlergh secùnd gwerryans an bÿs Talek a wre menystra Scol Mownt Pleasant in Cambron, scol bryveth secùnd level, le may whre va desky Kernowek dhe’n vebyon. Yma fotograf a onen a’n lessons-na dhe weles in lyver Berresford Ellis adro dhe’n tavas Kernowek. I’n vledhen mil naw cans pymp deg dew Richard Gendall a dhalathas lyver termyn gelwys An Lef. Dyw vledhen wosa hedna Gendall a ros an lyver termyn inter dewla Talek neb a jaunjyas hanow an jornal dhe An Lef Kernewek. An Lef Kernewek a bêsyas bys in dalleth an bledhydnyow peswar ugans. Dre rêson Talek dhe wodhvos adro dhe losow ha gwëdh, yma va pùpprës ow kemeres rach in folednow an An Lef Kernewek a vos kewar yn tien ow tùchya henwyn sciensek an flourys ha’n gwëdh campollys ganso in Kernowek. In An Lef Kernewek nyver onen onen pymp, yma Talek ow ry henwyn Kernowek rag oll an gwëdh kebmyn, ha kefrÿs ow profya henwyn nowyth, rag ensampel ‘fawen Eynda’ rag Catalpa, ‘gwedhen syvy’ rag Arbutus ha ‘spernen velen’ rag Berberis. Warbarth gans An Lef Kernewek Talek, neb screfa hag a gowsy Kernowek heb hockya, a dhyllas lies lyver in Kernowek Udnys screfys gans tus erel, spessly gans Caradar. Otobma radn anodhans: Trystan hag Ysolt, Cornish Simplified, Nebes Whethlow Ber, Whethlow an Seyth Den Fur a Rom, An Awayl Herwyth Sen Mark, Kemysk Kernewek, Lyver Hympnys ha Salmow, Lessons in Spoken Cornish, Passyon agan Arluth ha’n Mabynyogyon yn Kernewek. Ha heb mar Talek a dhyllas meur a brydydieth in folednow An Lef Kernewek. I’n vledhen mil naw cans naw deg dew Talek o bardh a Orseth Kernow dres try ugans bledhen. Y feu testscrif rës dhodho wàr an ocasyon-na gans peswar den o soodh an Bardh Meur dhodhans wàr y lergh. Y hyll an solempnyta bian-na bos gwelys wàr Youtube. Me a vydn leverel moy adro dhe Dalek i’n termyn usy ow tos.