(70) Elowen


© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Me a gampollas termyn alebma an maryach in Kernowek a yll bos gwelys wàr YouTube. Yth yw Mêstresyk Joan Petchey dhe weles rag termyn pòr got i’n gwydheo-na ow mos aberth i’n eglos dhe vos present orth an demedhyans. Hanow bardhek Mêstresyk Petchey o Elowen ‘Elm tree’ kyn nag o hy tanow kepar ha gwedhen. Hy a vedha ow wherthyn pùpprës, spessly adro dhe bobel wocky. I’n bledhydnyow try ugans ha deg ha try ugans hy a wrug meur abarth an tavas. Hy a wre restry kelgh a bobel neb a screfa an eyl dh’y gela in onen a’n tavosow Keltek. Hèn o a brow brâs i’n dedhyow pàn na ylly cowsoryon a yêthow Keltek metya warbarth yn fenowgh. Nyns o neyja a bris isel dhe gafos i’n oos-na ha heb mar nyns esa genen mainys cowethasek avell Facebook ha Twitter. Elowen a wre sensy in Trûrû Scol Hâv Kernowek kefrës, ha me êth dhe Gernow rag an scol-na moy ès unweyth. Meur a bobel yonk neb a gemeras radn in hy scolyow hâv êth in rag dhe wil hanow dhodhans aga honen i’n bës Keltek. Rag ensompel den yonk a wrug vy metya ganso i’n scol hâv yw Pendescador lebmyn a davosow Keltek in Canada hag yma y dhyskyblyon orth y braisya yn frâs. Talek a leverys dhybm dhyrag dorn fatell ylly Elowen bos “sarf”, saw warlergh nebes cabmùnderstondyng intredhon pàn wrug vy metya gensy kyns oll, hy ha me a acordyas yn tâ. Dres pùb tra an tavas o bern dhe Elowen. Hy ha pobel erel a whela côwsel Kernowek kenyver jorna ha spessly dëdh an Orseth, pàn o ûsadow radn ahanan sevel orth ûsya Sowsnek vëth. Yma cov dhybm a gerdhes cay an hens horn in Essa in bàn hag Elowen ow trailya ow geryow dhe Sowsnek rag nebonen genen na’n jeva ma’s nebes geryow. Condycyons i’n scol hâv a vedha nebes sempel, yn arbednek ow tùchya prejyow boos. An vledhen kyns ès me dhe gemeres radn i’n Scol Hâv rag an kensa prës, yth esa den nôbyl i’n scol; Scot o va saw tregys in Spayn Ev a’n jeva tybyansow coynt dres ehen adro dhe vyterneth lafyl Scotlond ha warlergh Elowen ev o pòr dhainty kefrës. An kensa gordhuwher pàn o scolers an scol esedhys wàr vyncow garow ow tebry aga sosten a fav pebys, Elowen a’n gwelas ow meras adro orth an bord hag a wovydnas orto pandr’o y whans. Yth esa ev ow whelas scala besias pò ‘finger bowl’. Elowen a wharthas yn colodnek ow terivas an whedhel-na. Re wrello an Arlùth kemeres mercy a’y enef dywysyk hy.