(76) Athelstan - Audrey


© 2017 Nicholas Williams

Pùb gwir gwethys / All rights reserved#

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In y ragscrîf dhe’n Gramer Kernowek in Archæologia Britannica yma Lhuyd ow screfa adro dhe'n Gernowyon: ‘Anjy a wrug gwitha Dewnans meur a dermyn, rag ny alja an Sowson gà gorra in mes a Geresk bys i’n vledhen naw cans ha whêtek warn ugans, pàn helghyas Athelstan, mytern oll an Sowson, an Brethon-na dres Awan Tamar.’ Athelstan a veu genys tro ha dyweth an nawves cansvledhen. Y das o Edward Cotha ha’y sîra wydn o Alfred Meur. Rain Athelstan a dhuryas dewdhek bledhen. Myterneth Scotlond ha Kembra ha Vîkyngas Evrok a dhegemeras y arlottes ev, hag ytho Athelstan yw consydrys an kensa mytern a Bow an Sowson yn tien. Athelstan a herdhyas an Gernowyon dhe’n west a’n Tamar, saw yth hevel fatell wrêns y aswonvos avell gwarthevyas in Kernow y honen kyn fe. Yma hanow Athelstan ow styrya ‘men bryntyn, jowal’ ha’n kensa element æthel ‘bryntyn, nôbyl’ o kebmyn lowr in henwyn an Angel-Saxons, tus ha benenes kefrës. Dew ensampyl a henwyn benenes gans an element æthel- inhans yw Athelberga hag Athelthryth. Me a vydn leverel neb tra adro dhe’n secùnd a’n re-na. Yma Æthelthryth ow styryra ‘nerth nôbyl’ ha’n venyn moyha a bris neb a’s teva an hanow-na o pensevyges genys in Ÿst-Anglya in kensa hanter a’n seythves cansvledhen. Kyn feu hy rës in maryach dhe dhew vytern, yth hevel fatell remainyas hy vyrjyn oll hy dedhyow. Pàn wrug hy diank dhyworth hy secùnd gour, Æthelthryth a fowndyas lenjy ha managhty warbarth in Ely; ha wosa hy mernans y feu peneglos nowyth Ely sacrys dhedhy hy ha dhe Peder Sans. Pùb bledhen an tressa warn ugans a vis Metheven y fedha fer sensys in Ely in hy onour hy. Warlergh devedhyans an Normans yth hevel fatell gemeras an form Latyn a’y hanow Adeldreda, ha’n form Frynkek anodho Audrey, tyller an versyon Sowsnek. Hy fer ytho o gelwys St Audrey’s Fair ‘Fer Sen Audrey’, le may fedha gwerthys dyllas benenes ha spessly taclow gwrës a lâss pò ‘lace’. I’n seytegves cansvledhen bytegyns ny wre an lâss-na plêsya an Pûrytans, rag y a gresy an lâss dhe dhysqwedhes re a wooth an bÿs, ha hèn o pegh. An lâss prenys orth fer Sen Audrey o gelwys St Audrey LaceTaudrey Lace. Condempnacyon an Pûrytans a ros dhyn an ger Sowsnek tawdry.