(79) Labm Gogmagog


© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In Jenesys Magog yw onen a seyth mab Jafet hag yma an profet Ezêkiel ow côwsel adro dhe nebonen henwys Gog dhyworth pow Magog. Yth o Gog onen a eskerens pobel Israel. I’n cansvledhydnyow warlergh termyn Ezêkiel, y feu dew dhen gwrës a Gog ha Magog, kyn nag o certan poran pleth esa aga fow. In Revelacyon yth yw leverys fatell wra Satnas lêdya in stray an nacyons a Gog ha Magog ha’ga hùntell rag gwerrya warbydn an Gristonyon. Yma versyon aral a whedhel Gog ha Magog kefys in Breten Veur. Dioclêcyan, emprour bylen Rom, a’n jeva myrhas uthyk. Nyns ens y whensys dhe dhemedhy gans an dus a gafas aga thas ragthans hag y a dhiancas dhyworto ha dos in gorhal dhe Vreten Veur. Ena y a gafas gwer hag y feu denythys dhedhans issew a gewry hegas. Yth o Gog ha Magog an dhew gowr dhewetha. Y aga dew a veu kechys ha chainys in Loundres rag gwetha an cyta dhyworth hy eskerens. Yma imaj a Gog hag a Magog dhe weles bys hedhyw i’n Guildhall cyta Loundres. Yma ken versyon whath ow longya dhe’n west a Vreten Veur. Dell hevel yth o dew fygùr hûjes brâs trehys i’n calgh pò ‘chalk’ in Porth Sùtton in Aber Plym. Ny yll an pyctours bos gwelys na felha rag y fowns y dystrôwys i’n secùnd hanter a’n seytegves cansvledhen. Warlergh crejyans an bobel onen a’n dhew dhen o an cowr Gogmagog, hag apert yw an hanow-na dhe vos Gog ha Magog jùnys warbarth. Hèm yw an whedhel warlergh Jeffry Menow: pàn wrug Brûtùs ha’y Romans dos dhe Vreten rag bos tregys inhy, yth esa teylu a gewry i’n pow solabrës. Y a assaultya Brûtùs ha’y ost in Totnes in Dewnans. Tus Brûtùs a spêdyas dhe ladha oll an gewry marnas onen yn udnyk. Ev o Gogmagog casadow, hager-gowr o dewdhek tros’hës in uhelder. Onen a gampyoryon an Brytons o Coryneùs, chyften Kernow. Ordnys veu gwary omdowl inter Coryneùs ha Gogmagog, rag omdôwlor skentyl o Coryneùs. Orth an kensa metyans Gogmagog a dorras try asen in tenewen Coryneùs. Serrys brâs Coryneùs a sêsyas an cowr ha ponya ganso bys i’n cost. Ena ev a dôwlas Gogmagog bys in cres an mor ha’n cowr a veu budhys. An tyller may wharva an dra, dell lever Jeffry, o gelwys Lamm Gogmagog bys in y dhedhyow y honen. Ha pelha an towl-na a veu an dalathvos a omdowl Kernowek.