© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Cadoc Sans a veu genys in soth a Gembra orth dyweth an whefes cansvledhen. Ev a fùndyas coljy ha managhty a bris in Llancarfan in Nans Morganùg. Cadoc a viajyas dhe lies tyller i’n enesow-ma hag y feu lies eglos fùndys ganso. Pàn dheuth ev dhe Gernow ev a vysytyas an Garrek Loos i’n Coos. Wàr y fordh tre, ev a wrug dhe fenten spryngya in bàn a ylly yaghhe clevejow pengasen ha spessly prëves i’n dorr pò ‘intestinal worms’. Yth hevel fatell usy an whedhel-na ow referrya dhe Fenten Cadoc ogas dhe Lannwedhenek pò ‘Padstow’. Yth yw Cadoc gwelys kefrÿs i’n gwary Bêwnans Ke, le mayth yw ev campollys in dadn an versyon Kernowek a’y hanow: Casek. I’n gwary yth yw dewdhek cadnas danvenys gans Lûcyùs emprour Rom dhe Arthùr i’n Breten Veur dhe wovyn orto prag nag usy ev ow ry trybût dhe’n emprour. An nawves cadnas a gows yn cortes orth Arthùr indelma: Lowena dhis, a dasek gwarthevyas meur a wlasow. Ny ve dha bar re Gasek na ny’n gwelvyth lagasow i’n bÿs hogen! A les yw hedna, rag i’n text Latyn Vita Cadoci ‘Bêwnans Casek’ yth yw Casek Sans hag Arthùr Mytern eskerens an eyl dh’y gela. Herwyth an Vita yth o Lligesog Dorn Hir chyften galosek in mesk an Brytons. Ev a ladhas try marhak a varhogyon Arthùr Mytern. Nyns o chyften vëth parys dhe ry sentry pò ‘sanctuary’ dhe Lligesog rag own a’n mytern brâs. Casek bytegyns a ros sentry dhodho dres seyth bledhen. Ena Lligesog a veu traitys dhe Arthùr ha’n mytern a dheuth gans ost brâs dhe eglos Casek orth gladn Dowr Ùsk. Y feu mater an dyspûtyans settys dhyrag tus sans Kembra rag cafos aga breus. An sens a dhetermyas fatell o res dhe Lligesog ry try hans buwgh dhe Arthùr, cans buwgh avell aqwîtyans rag pùbonen a’y varhogyon ledhys. Saw ny via Arthùr pës dâ mar ny via oll an buhas labol i’n aga lyw, hèn yw dhe styrya, rudh arâg ha gwydn adhelergh. Ny wodhya den vëth fatla alsa bestas a’n sort-na bos kefys. Ytho y feu try hans buwgh gebmyn drës dhyrag Casek ha dre verkyl aga lyw a veu trailys dhe rudh ha dhe wydn. Saw pàn wrug y dus dry an gwarthek dhe’n mytern dres Dowr Ùsk, an buhas êth mes a wel yn tien ha ny veu gesys in aga le ma’s nebes plansow reden. Pàn welas Arthùr hedna, ev a gemeras edrek brâs hag a besys Casek dhe ry gyvyans dhodho.