(81) Tyck-tack-mallard


© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Yth yw an gwary gelwys in Sowsnek ducks and drakes aswonys in lies tir. An gwarior a sev ryb poll pò lydn gans bùlien in y dhorn. Ev a dôwl an men in mes rag gweles pyseul eur a yll ev gwil dhe’n vùlien daslebmel wàr enep an dowr. Yma an vùlien ow kelly toth peskytter may whrella hy tùchya an dowr, hag ytho yma finweth dhe nyver an labmow a wra hy gwil. Yma cov dhybm a dermyn lies bledhen alebma pàn wrug ow broder vy ryb poll pòr gosel gwil dhe ven plat lebmel tredhek treveth. I’n Stâtys Udnys ducks and drakes yw gelwys ‘water skipping’ hag y fëdh an Amerycans ow sensy kestrîfow i’n gwary. An present campyor in Ameryca a wrug dhe’n vùlien lebmel êth gweyth ha peswar ugans. Towlow marthys a’n sort-na a yll bos gwelys wàr Youtube. I’n enesow-ma ha wàr brâstir Ewrop dre vrâs pàn vo sensys kestrif ny res dhe’n men lebmel ma’s tergweyth. Towl an gwary wàr an tu-ma a’n Mor Atlantek yw dhe worra an men pelha ès ken den vëth. Yth yw cresys fatell usy sowena an towl ow powes yn tien wàr dynder enep an dowr pò an surface tension sow yma taclow erel moy a bris. An vùlien a dal bos mar blat avell possybyl. Dre rêson an vùlien dhe vos ow troyllya por uskys, yth yw hy fest sad pò stable. Pàn wrella hy tùchya an dowr, yma hy ow herdhya an dowr dhe’n leur hag indella ow provia lyftyans dhedhy hy honen. Elyn a ugans degrê yw an elyn gwelha. Drefen an gwary-ma dhe vos aswonys in lies tir yma lies hanow ragtho. Wàr vrâstir Ewrop yma lies onen a’n henwyn ow styrya ‘gwil qwylkydnow’ pò ‘gwil heyjy’. In Bretonek bytegyns ymowns y ow leverel spazhañ an dour ‘spadha an dowr’ pò castrate the water. Yma moy ès udn hanow rag an gwary in Kembrek, in aga mesk dip-dap-do, dic-dac-do ha dili-dac-do. Nyns yw hanow vÿth kefys i’n textow Kernowek, saw in y lyver adro dhe radnyêth Sowsnek Kernow yma Fred Jago ow ry ‘tic-tac-mollard’ avell hanow rag ducks and drakes. Yth yw an ger-na ogas lowr dhe’n henwyn Kembrek. Pelha yma an ger ‘mallart’ drake kefys i’n gwary Kernowek Origo Mundi hag apert yw ytho y vos radn a erva agan tavas. Rag hedna me a vynsa comendya ‘tyck-tack-mallard’ avell hanow Kernowek rag ducks and drakes.