© 2017 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Yth yw Modred campollys rag an kensa prës in Annales Cambriae pò ‘Cronyclys Kembra’ in dadn Vledhen agan Arlùth pymp cans try deg seyth. Yma leverys ena fatell godhas Modred warbarth gans Arthùr in cas Cammlan. Nyns eus hynt vëth ena fatell o Modred escar Arthùr i’n vatel. In tyleryow erel i’n lien Kembrek yth yw Modred praisys yn frâs. I’n tradycyon moy adhewedhes bytegyns yth yw Modred traitour brâs. Yma hedna growndys wàr an narracyon in Istory Jeffry Menow, a lever fatell o Modred noy Arthùr Mytern saw ev dhe ombrevy fâls dh’y ôwnter. Pàn wrug Arthùr gasa Breten Veur rag gwerrya warbydn Lûcyùs, emprour Rom, an mytern a asas Modred in y le may halla va rêwlya an wlascor dre ewnhenseth. Modred bytegyns a drailyas warbydn y arlùth. Ev a wrug mytern Breten Veur anodho y honen hag a gemeras dhodho avell y wreg Gwenhever Myternes, gwreg y ôwnter. Yma an whedhel-na kefys i’n gwary Kernowek Bêwnans Kê, neb yw fùndys in part wàr istory Jeffry. In gwir i’n gwary Kernowek Modred yw hager-turont. Wosa bos cùrunys gans epscop ownak, Modred a lever: Me yw mytern in Breten! Mars eus fol vëth na faitour er ow fynn a gôwso màn, ev a’n jevyth cales rann: me a’n ladh avell traitour! Modred an form a’n hanow ûsys gans Jeffry Menow yw Kernowek Coth. In Kembrek Modred yw aswonys avell Medrawd, Medrod hag yth hevel fatell wrug an Gembrion kelmy an hanow gans an ger medraf ‘gallaf, convedhaf’ ha’y jaunjya indella. I’n dedhyow coth in Kernow yth o Modred aswonys avell hanow gorow avês dhe noy Arthùr. Tre Modred yw hanow tyller kefys in Kernow in Lyver Dëdh Breus pò ‘the Domesday Book’. Hag yma tyller in Kernow hedhyw gelwys Ros Modres ogas dhe Bensans. In Bêwnans Ke an traitour Modred yw gelwys Modres. Hèn yw dhe styra fatell yw -s gwrës a’n -d orth dyweth an hanow, kepar dell yw ûsys in Kernowek Cres. Nyns yw -dr- in cres an hanow bytegyns gwadnhës dhe -sr- nefra. Yth hevel fatell yw hedna rewl in Kernowek. Pàn vo -d- hag -r- ow tos warbarth in Kernowek, yma an d ow remainya heb chaunjya. Ny a yll gweles hedna in lies ger, rag ensampyl, crodra ‘to sift’, edrek ‘remorse’, godros ‘to threaten’, Hedra ‘October’, ladra ‘to steal’ ha‚ pedry ‘to rot’. I’n hanow Redruth yma -d- hag -r- ow tos warbarth. Nyns yw compes ytho chaunjya an d dhe s i’n hanow. Redrudh yw an form ewn. *Resrudh yw camgemerys.