(90) Kembra


© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

‘Wales’ in Kembrek yw gelwys Cymru, spellys gans u orth dyweth an hanow. In Kembrek an ger rag ‘Welshmen’ yw Cymry, spellys gans y orth an dyweth. In gwiryoneth Cymru ‘Wales’ ha Cymry ‘Welshmen’ yw an keth ger. Yth o kebmyn i’n dedhyow coth ûsya hanow an dregoryon avell hanow an pow y honen. Ny a wel ensampyl dâ a’n ûsadow-na i’n hanow Kernow, rag yma Kernow ow tos dhyworth Cornovii, pobel esa tregys i’n pow pàn dheuth an Romans dhe Vreten Veur. Coynt lowr ny wrug an hanow Cymru dallath in Kembra saw i’n Hen-North, hèn yw dhe styrya i’n North a Bow an Sowson hag i’n Soth a Scotlond. Dre lycklod an hanow Cymry a veu ûsys rag an kensa prës in dedhyow dewetha an empir Roman in Breten Veur. Dell hevel, y feu an ger Cymry desmygys gans Brethonyon Roman an North a Bow an Sowson ha’n Soth a Scotlond rag referrya dhodhans aga honen. Indella y a ylly decernya intredhans aga honen ha’n dus esa ow tos in nùmbers brâs dhyworth Wordhen rag bos tregys i’n North a Vreten. An re-na o Gwydhyly hag i’n pympes ha’n whefes cansvledhen an Vrethonyon a ylly convedhes lowr a davas an dus nowyth devedhys. Ytho Brethonyon an North a elwy aga honen *Kombrogi ‘tus a’n keth bro, compatriots’, ha’n form-na *Kombrogi a ros Cymry. Apert yw fatell apperyas an hanow Cymry kyns oll i’n North adar in Kembra hy honen, rag yth yw an hanow Cymry gwethys in henwyn Sowsnek Cumberland ha Cumbria. Ny a wor fatell vedha Kembrek côwsys in Cùmbrya bys i’n dhewdhegves cansvledhen. In gwir yth yw Brethonek lies onen a henwyn tyleryow an tireth-na. Penrith in Cùmbrya rag ensampyl yw hanow Keltek pur. Yma Penrith ow sygnyfia ‘the head of the Ford’, pen rhyd in Kembrek ha penn rës in Kernowek. Warlergh termyn y feu an hanow Cymru lymytys yn tien dhe’n pow Keltek dhe’n West a Bow an Sowson. Den dhyworth Cymru in Kembrek yw Cymro ha’n versyon Kernowek a hedna yw kefys avell Kembro in Kernow an Osow Cres. Wàr batron Cymru in Kembrek rag ‘Wales’ Nance a brofya Kembry in Kernowek. Saw yma Lhuyd ow ry Kembra rag ‘Wales’ ha tus Kembra rag hy thregoryon. Pelha in Bêwnans Ke yma Kembra campollys dywweyth. Ytho an hanow ewn Kernowek rag ‘Wales’ yw Kembra.