(92) Awan Dowr Ryver


© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Rag ‘river’ in Kernowek yma Nance of profya avon, liesek avenow. An ger-na rag ‘river’ yw campollys unweyth in Kernowek Coth i’n form auon hag yth hevel fatell o an kesson in cres an ger [w] adar [v]. Ny a wor hedna dre rêson Lhuyd dhe ry auan ‘river’ gans [w] moy ès unweyth. Pelha yma awan dhe weles in hanow Awen Tregare ‘Tregeare Water’ dhyworth dyweth an seytegves cansvledhen. Hèn yw an udn ensampyl certan in henwyn tyleryow. I’n textow Kernowek pàn vo nebonen ow referrya dhe ‘river’ gans y hanow arbednek, an ger yw dowr. In Origo Mundi rag ensampyl an epscop a lever: nyns eus pons war Dhowr Cedron. In Resurrexio Domini an emprour a gomond may fe corf Pylat tôwlys i’n dowr usy ow resek dre cyta Rom. Ev a lever:

Têwlowgh ev in trog a horn 

in Dowr Tyber in neb corn

may fo budhys.

Hag i’n gwary Bewnans Kê an traitour Modres a lever adro dh’y gothman Dûk Chellery:

An dûk an jevyth pòr wir

rag y lavur oll an tir 

a Dhowr Hùmbyr dhe Scotlond.

Yth yw an keth ûsadow dhe weles i’n Dowr Gwavas ‘Gwavas Lake’, lavar ûsys gans Jowan Boson rag côwsel adro dhe radn gosel a’n mor avês dhe borth Lulyn. Saw mars yw nebonen whensys dhe gôwsel adro dhe river in Kernowek heb campolla hanow an dowr, nena yth hevel fatell yw ewn gwil devnyth a’n ger ryver. Pàn vo Meryasek in Breten Vian ev a lever:

Omma sur ryb an castel

gelwys Pontelîn defry

wàr an meneth diogel

hag orth an ryver surly

a Josselîn

chapel guthyl me a vynn

rag gordhya Maria wynn

kynth yw tyller gwyls ha yêyn.

Pelha yma Jowan Tregear ow screfa: In seythves chaptra a Jowan agan Savyour a leverys, Neb a gressa inof vy kepar dell lever an scrîbys, ryvers a dhowr a wra resek in mes anedha y. Ytho pàn ven ny ow referrya dhe ryver arbednek ny a yll leverel Dowr Tamar, Dowr Alen, Dowr Camel, hag erel. Saw pàn ven ny whensys dhe gôwsel adro dhe ryver heb campolla y hanow, an ger compes in Kernowek yw ryver, liesek ryvers.