© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Pùbonen re glôwas a Arlodhes Guinevere, myternes fest teg Arthùr Mytern. Gwredhyow an hanow Guinevere yw Kembrek le mayth yw hy gelwys Gwynhwyfar. Hèn yw goos nessa Findabair in Godhalek, hanow myrgh Medb, myternes Connaught. Yma Gwynhwyfar ha Findabair aga dew ow tos dhyworth ragform *Windo-sêbra ‘hudores wydn, hudores teg’. In Istory Jeffry Menow, pàn wrella Arthùr departya mes a Vreten rag omlath gans emprour Rom, yma va ow telyfrya y vyternes inter dewla Modred y noy, may halla va hy gwetha yn saw. Yma Modred dyslel ow trailya warbydn y ôwnter hag ow constrîna an vyternes dhe ankevy hy arlùth ewn ha demedhy ganso y honen. Yma an whedhel-na dhyworth Jeffry ûsys i’n gwary Kernowek Bewnans Ke, le may ma an vyternes gelwys Gwynewer. In versyon aral a whedhel Gwynewer, nyns yw Modred hy haror hy saw Syr Lancelot, an gwelha marhak in oll cort Arthùr. Wostallath yma Lancelot ow servya an vyternes avell marhak lel an mytern. Pàn vo hy sêsys ha kemerys dhyworth an gort gans eskerens an mytern, yma Lancelot ow spêdya dh’y selwel. Nebes ha nebes bytegyns yma Gwynewer ha Lancelot ow codha in kerensa dhown gans y gela. I’n gwetha prës ymowns y ow qwil avoutry in dadn frigow an mytern y honen. Whedhel cowethyans ansans Gwynewer ha Lancelot yw kefys rag an kensa prës in bardhonegow Chrétien de Troyes, prydyth Frynkek a’n dhewdhegves cansvledhen. Yma auctours erel ow sewya narracyon Chrétien hag yth yw avoutry Gwynewer ha Lancelot mater brâs in Idyllys an Mytern gans Tennyson. In gwir rag Tennyson yth yw avoutry Lancelot ha Gwynewer, pegh poos i’n very cres a gort Arthùr, an rêson rag y eskerens dhe fetha Arthùr hag ytho rag kescar felshyp an Tâbel Rônd. A les yw mater aral inwedh. Yth o Gwynewer kebmyn avell hanow mowysy in Kernow i’n dedhyow coth. An hanow a wrug dysplegya der an stappys Gwynhewer dhe Gynhewer dhe Gynefer dhe Jenéfer. Ena pàn veu va drës aberth in Sowsnek Jenefer a drailyas dhe Jénefer. Nyns o Jenefer kebmyn ma’s in Kernow yn udnyk. Ena in dallath an ugansves cansvledhen Bernard Shaw a wrug dôwys an hanow Jennifer rag an chif-character in y wary The Doctor’s Dilemma. Adro dhe hanter-cans bledhen wosa hedna yth o Jennifer onen a’n henwyn rag mowysy moyha kebmyn in oll bÿs an Sowsnek. Wàr verr lavarow Jennifer wostallath o an keth hanow avell Gwinevere ha pelha Jennifer in y dhevedhyans yw Kernowek.