© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

An den aswonys in Sowsnek avell ‘John the Baptist’ yw campollys moy ès unweyth i’n textow Kernowek. In Bêwnans Meryasek ev yw gelwys Sen Jowan Baptyst hag yma Tregear orth y henwel Jowan Baptyst. Jowan Baptyst ytho yw y hanow ewn in Kernowek. Jowan o profet wàr batron profettys an Testament Coth. Ev o gwyskys in dyllas a vlew cowrvargh hag a dhebry locùstyow ha mel gwyls. Moy ès ken den vëth Jowan a gôwsy adro dhe dhevedhyans Crist. Ev a levery fatell wre onen dos wàr y lergh mayth o va ‘ùnwordhy rag bocla y eskyjyow.’ Jowan a bregowthy edrega; ha pàn wrella an bobel meneges aga fehosow, ev a’s besydhya in Dowr Jordan. Kyn nag o otham dhe Grist a edrega nag a vesydhyans, ev a dheuth dhe Jowan hag a veu besydhys ganso. Rag hedna an besydhyans yw part brâs whath a vêwnans an eglos Cristyon. Whedhel mernans Jowan yw aswonys dâ. Erod mytern o demedhys gans Herôdyas, gwedhowes y vroder Felyp. Jowan a bregowthas warbydn Erod ow leverel nag o lafyl dhodho kemeres gwreg y vroder avell y wreg y honen. Herôdyas a sorras brâs. Erod ytho a dowlas Jowan in pryson, saw nyns o va parys dh’y ladha. Herôdyas bytegyns o whansek dh’y weles ledhys. Pàn dheuth pedn bloodh Erod, myrgh Herôdyas a wrug dauncya dhyrag an mytern ha’y blêsya yn frâs. Erod a bromyssyas dhedhy pynag oll dra a wrella hy pesy. An vowes a wovydnas orth hy mabm pandra dalvia dhedhy govyn. Hy gorthyp o sempel: pedn Jowan Baptyst wàr dallyour. Ytho Jowan Baptyst a veu dybednys ha’y bedn rës dhe’n vyrgh. Hy a’n ros dh’y mabm hy. Nyns yw myrgh Herôdyas henwys i’n Beybel saw yma scolers ow cresy Salome dhe vos hy hanow hy. In y wary Salome yma Oscar Wilde ow tyghtya mernans Jowan in maner fest bewek. Saw me ow honen, pàn glewyf campollys mernans Jowan Baptyst, ny allama ma’s remembra geryow an gân goth Vretonek: Sant Yann benniget a zo bet dibennet gant eun danserez ‘Sen Jowan benegys re beu dybednys gans mowes dauncya.’