(96) Presep an Nadelyk


© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

Golok gebmyn i’n eglosyow hag in tyleryow poblek in sêson an Nadelyk yw presep an Nadelyk pò the Christmas Crib. Yth yw hedna hevelep a’n stâbel may feu genys Jesu Crist herwyth Awayl Sen Lûk. Ino y hyll bos gwelys fygûrys bian ow portreya an Werhes Ker Maria, Josef hy gour, an ojyon ha’n asen adhelergh dhedhans ha’n flogh nowyth-genys ow crowedha i’n presep intredhans. Y hyll bos gwelys kefrës an vuguleth neb a glôwas i’n gwelyow an nowodhow dâ a enesygeth an Messias hag a dheuth tothmen dhe Bethlem rag y wordhya. In seythednow warlergh Nadelyk y fÿdh gorrys i’n stâbel an Dus Fur hag in aga dewla royow rag an Savyour yonk. A les ywa bytegyns nag yw an stâbel campollys ma’s in Awayl Sen Lûk, ha nag yw an Dus Fur campollys ma’s in awayl Sen Mathew. I’n kensa qwarter a’n tredhegves cansvledhen Sen Francys Assîssy a vysytyas an Tir Sans hag y feu dysqwedhys dhodho an tyller warlergh crejyans an bobel may feu genys agan Savyour. Pàn dheuth ev tre Sen Francys a erviras presentya dhe’n bobel an stâbel, Maria, Josef, an flogh bian, hag erel, avell neb tra hewel. Ev a wrug indella may halla an bobel gorra aga brës wàr Grist ha’y enesygeth. Rag i’n dedhyow-na solabrës yth o an bobel re barys dhe bredery a elementys materyal an Nadelyk ha spessly a’n royow a wrens y cafos. I’n dallath Stâbel Sen Francys a vedha dysqwedhys gans actours, pobel vew ha bestas bew. Dres an bledhydnyow bytegyns fygûrys bian a bry pò a bredn a gemeras le an warioryon. Me a redyas nebes bledhydnyow alebma a dre in cres Pow an Sowson le may whrug an gonsel ervira na wrens y na fella settya presep Nadelyk in bàn in tyller poblek in aga thre. Avell rêson rag an determyans-na y a leverys y hylly an presep offendya cytysans nag o Cristonyon. Yma hedna ow tysqwedhes lack a gonvedhes. I’n part-na a Bow an Sowson an radn vrâssa a bobel nag yw Cristyon yw Moslems. I’n Qur’an, lyver sans an Moslems, nyns yw campollys ma’s udn venyn gans hy hanow. An venyn-na yw Maria mabm Jesu. An Moslems a grës fatell o Maria gwerhes pàn dhug hy Crist. Pelha yth yw Jesu, in dadn an hanow Isa, onen a’n profettys brâssa in Islam, le mayth ywa gelwys inwedh Massih, hèn yw MessiasCrist. Scant ny via Moslem vÿth offendys gans presep an Nadelyk.