(97) Wassêl


© 2017 Nicholas Williams

Pùb gwir gwethys / All rights reserved

Clyckya obma ha goslowes / Click here to listen


Text an recordyans / Text of the recording

Egery in dyw several fenester rag gweles an text ha goslowes i’n kettermyn.

Open in two separate windows to see the text and listen at the same time.

In Sowsnek Canow Nadelyk yw gelwys carols. Carol in y dhevedhyans o dauns a lowender. Goos nessa an ger-na yw an ger carolly in Kernowek usy ow styrya dauncya. Y fedha an ger carol ûsys rag an gân esa ow mos gans an dauns. In agan dedhyow ny an ger Sowsnek carol yw ûsys rag cân a joy in sêson an Nadelyk. Lies onen a’n canow gelwys carols in Sowsnek yw hympnys Nadelyk ha radn anodhans re beu trailys dhe Gernowek, rag ensampyl: Dyn dòm lowen yns wàr vàn i’n nev clegh ow seny! ha Kyns in cyta Davyth rial ha Clew, canasow nev a gân gormola dhe’n Flehyk splann. Yma canow erel kelmys gans an Nadelyk saw na’s teves ma’s colm gwadn gans an sêson. Ensampyl dâ yw Good king Wenceslas. Nyns eus colm vëth dhe’n gân gans an Nadelyk marnas an mytern dhe weles an den bohosak Degol Stefan, hèn yw an jorna warlergh Nadelyk. Cân aral yw Here we come a-wassailing. Nyns yw whedhel an Nadelyk campollys i’n gân-na naneyl. Wassailing in Sowsnek o ûsadow coth. Pobel a wre mos dhia dharas dhe dharas ow whansa yêhes ha sowena dhe’n dregoryon i’n vledhen esa ow tos. An ger wassail y honen yw Sowsnek Coth hag yma va ow mênya ‘Bëdh yagh.’ Y fedha an geryow-na leverys kyns ès eva an dewas dhe yêhes an den esa worth y brovia. Dell usy ow wharvos yma an ger Sowsnek wassail kefys i’n tavas Kernowek y honen—i’n gwary Passio Christi. Yma Crist i’n grows hag ev a gry in mes Ely ely lama zabactany ‘A Dhuw prag y whrusta ow forsâkya?’ Onen a’n tormentours a grës Crist dhe elwel Elias, saw y goweth a lever:

Nyns yw Ely a elow a.

Sehes sur dhodho yma.

Ev a’n jeveth drog-wyras:

Ottensa genef parys:

bystel aysel kemyskys,

wassêl mars eus sehes brâs.

Bystel yw ‘gall’ hag aysel yw ‘vinegar’. Ny yllyr leverel hedna dhe vos plegadow avell dewas. Rag an wassêl in Pow an Sowson hag in Kernow an ganoryon a vydna cafos cîder tobm spîcys ha martesen neb tra deg dhe dhebry inwedh. Yth o an ûsadow a’n wassêl aswonys in Redrudh i’n dedhyow coth hag y feu an practys dasvewys nebes bledhydnyow alebma in dadn an hanow Redruth WassailWassêl Redrudh. Yma an ceremony ow kemeres le an Sadorn dewetha a vis Du. Ny vanaf vy lebmyn ma’s leverel gromercy dhywgh why oll neb a wrug goslowes orthyf obma dres an vledhen eus tremenys. Nadelyk lowen re’gas bo ha Bledhen Nowyth Dâ!