© 2025 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
An Kernowek rag ‘Christmas’ yw Nadelyk hag yma an ger-na destys tergweyth i’n tavas hengovek. Yma oll an examplys dhyworth Kernowek Dewedhes. Gesowgh ny dhe veras ortans an eyl wosa y gela. In Archaelogia Britannica in dadn Natalis ‘birthday’ yma Lhuyd ow compla Nadelik, deu Nadelik ‘Natalis Christi’, hèn yw ‘dëdh genesygeth Crist.’ Merkyowgh fatell usy an ger Latyn Natalis ow tysplêgya avell Natale ‘Christmas’ in Italyan hag avell Noël in Frynkek. Yma Nadelyk in Kernowek ow tos dhyworth an form Natalicia in Latyn, hag yma hedna ow ry Nadolig in Kembrek, Nadeleg in Bretonek ha Nollaig in Godhalek Wordhen. An secùnd exampyl a Nadelyk yw kefys in desmyk dhyworth Wella Gwavas pryntys gans Pryce: Flogh a veu genys in mis Merth, Ny a drehys y bêgel in mis Est; Ev a ros towl dhe prownter Powl, mis Du kyn Nadelyk. Assoylyans an desmyk yw barlys ‘barley’. An barlys a veu gonedhys in mis Merth ha mejys in mis Est. An barlys a veu ûsys ena dhe wil coref; prownter plu Powl a evas an coref gwrÿs anodho in mis Du dhyrag Nadelyk hag ev a godhas medhow. An tressa devyn yw kefys in Dornyscrîvyow Ùstyk: Gwâv in Hâv tereba Golowan, ha Hâv in Gwâv tereba Nadelyk. Yma tereba ena ow sygnyfia ‘until’ ha kynth usy an ger owth apperya dhe vos rag-ger pò ‘preposition’, in gwiryoneth kemel pò ‘clause’ ywa. Tereba yw complys gans Pryce avell trebe ‘until, as far as, ’till when.’ Yma tereba ‘until’ kefys gans Wella Rowe in Che a wra debry dha vara, tereba che dha traylya dha’n nor. Dell hevel tereba yw dysplêgyans a hedre vo. Yth yw hedna kefys in dhodho ny yllowgh gul drog sur me a grÿs hedre vo in y gerhen (Resurrexio Domini) hag in hedre vo bÿs in y le (Bêwnans Ke). Ena hedre a veu cot’hës ha’n stap-na yw gwelys in dir vo an enef in kig mab den (Sacrament an Alter). Wàr an dyweth dir vo a dysplêgyas dhe treba, tereba. Yma Golowan ow tos dhyworth Gol Yowan ‘St John’s eve’, hèn yw an tressa warn ugans Metheven, cres an hâv. Avês dhe Golowan nyns yw Yowan ‘John’ heb /J/ avell an kensa kesson kefys in tyller vÿth i’n textow Kernowek. Styr an lavar yw hebma: ny vÿdh an gewar in Kernow re dhâ bys in cres an hâv, ha ny vÿdh hy re dhrog bys in Nadelyk. Gans hedna ny a yll comparya an lavar coth in Wordhen: Samhradh gach síon go Nollaig ‘Pùb kewar yw hâv bys Nadelyk.’