Brojer Conyn ha'n Popet Pek - lovinglivingcornish

Joel Chandler Harris

Lymnans gans E.W. Kemble

KENSA RANN

WHEDHEL A'N POPET PEK MARTHUJY

(Chaptra II, Êwnter Remus, y lies Cân, y lies Dyth)

‘A ny wrug an lowarn cachya an conyn byscath, Ownter Remus?’ a wovynnas an meppyk i’n nessa gordhuwher.

‘Porra nes o va dh’y wil, a velder, atta gwir– an Brojer Luarn-na. Udn jedh warler Brojer Conyn dh’y dulla gen gwredh an cala, Brojer Luarn eth ha gawas nebes pek, ha kemysky hedna gen tabm tereba’tin, ha formya taclen rug e cria Popet Pek, hag e gemeras an Popet Pek-ma ha’y settya en vorr vras, ha mos y honen dho rowedha i’n prysk rag gweles an peth ra codha. Nag o res gortas pell naneyl, rag awatta Brojer Conyn o’walkya by-an-by an vorr ahes – lyppety-clyppety, clyppety-lyppety – mar dhyveth vell piajen an coos. Brojer Luarn, e qwetyas dadn gel. Brojer Conyn deuth en freth t’reba spia Popet Pek, nena rug e sevel stag war y arrow delher, pecar ha pe va en sowthan bras. An Popet Pek, settys dho sedha o hy, atta gwir, ha Brojer Luarn, e qwetyas dadn gel.

‘“Durda dho why!” medh Brojer Conyn, a’medh e – ‘eborn vra’ metten-ma!’ a’medh.

‘Popet Pek na laver tra veth, ha Brojer Luarn, e qwetyas dadn gel.

‘“Ha fatl’ew ehes che hedhow en jedh?” medh Brojer Conyn, a’medh e.

‘Brojer Luarn, e qwynkya lagas por lent, ha qwetyas dadn gel, ha’n Popet Pek, hy na laver tra veth.

‘“Fatla gena che, dhana? Oja bodhar?” medh Brojer Conyn, a’medh e. “Rag mars osta che, me ell cria meur uhella dho voy,” a’medh.

‘Popet Pek na rug gwaya, ha Brojer Luarn, e qwetyas dadn gel.

‘“Re wothys oja wir, hag eus myshef ortha je,’ medh Brojer Conyn, a’medh e, ‘ha me vedn sawya je, eus ober vas ortha ve,” a’medh.

‘Brojer Luarn, e rug sort a wherthyn en y vranjen, atta gwir, bus Popet Pek na laver tra veth.

‘”Me vedn desky dhis pana vaner ew cows tredh tus wordhy, kyns es hedhy kyn fe,” medh Brojer Conyn, a’medh e. “Marnas che hepcor an hot-na ha salujy, me vedn stewany je goly bras,” a’medh.

‘Popet Pek na rug gwaya, ha Brojer Luarn, e qwetyas dadn gel.

‘Brojer Conyn a besyas govyn worty, ha’n Popet Pek, hy besyas heb lawl tra veth, tereba Brojer Conyn dho dedna y dhorn whare, atta gwir, ha bobm! e gronkyas hy fedn war denewen. Hag en very prej-na y joram molass o scattys. Y dhorn veu glenys fast, hag e na ell lowsya. Th’era an pek o’crapya. Bus Popet Pek, hy na rug gwaya, ha Brojer Luarn, e qwetyas dadn gel.

‘“Marnas che vedn gara ve dho wary, me ra knoukya unweyth arta,” medh Brojer Conyn, a’medh e, ha desempys e rug gweskel gen y dhorn aral, ha veu glenys en ketella. Popet Pek, hy na laver tra veth, ha Brojer Luarn, e qwetyas dadn gel.

‘”Lows ve, kyns pub stoffyas dho vos botyes genam dhia gorf je,” medh Brojer Conyn, a’medh e, bus an Popet Pek, hy na laver tra veth. Ma hy o’crapya prest, ha Brojer Conyn rug kelly treys frank en keth vaner. Brojer Luarn, e qwetyas dadn gel. Nena Brojer Conyn a grias, marnas hy ra lowsya, ter vedn e cornya hy cabm. Dhan e rug cornya, hag awatta glenys y bedn kefres. Nena Brojer Luarn, ev a dheuth a’mes, cosel y stap, ha mar wiryon y fass avell onen a’n mockedhnow a vabm je.

‘”Durda Brojer Conyn,” medh Brojer Luarn, a’medh e. “Semlant je ew tuch glenys hedhow metten,” a’medh, hag awatta va o’rolya war an leur, o’wherthyn hag o’wherthyn tereba na ell e namoy. “Lyckly che ra debry kydnyow genama ve treveth-ma, Brojer Conyn. Me rug gawas nebes gwredh cala, ha na vadnam kemeres ascus,” medh Brojer Luarn, a’medh e.’

Omma Êwnter Remus a wrug powes, ha tenna yàm dew bens y boster in mes a’n lusow.

‘An lowarn, a dhebrys ev an conyn?’ a wovynnas an meppyk, neb a veu an whedhel derivys dhodho.

‘Na ra’n whedhel mos pella veth,” an cothwas a worthebys. ‘Ea martessen, poken martessen na. Radn a laver ter dheuth Justys Ors ha’y lowsya – radn a laver na rug e man. Me a glow Mestres Sally o’celwel. Che dal fesky dy.’

NESSA RANN

FATELL O MESTER CONYN RE SKENTYL RAG MESTER LOWARN

(Chaptra IV, Êwnter Remus, y lies Cân, y lies Dyth)

‘Ownter Remus,’ yn medh an meppyk unn gordhuwher, ow cafos an cothwas ha hemma bohes y whel, ‘a wrug an lowarn ladha ha debry an conyn pan y’n cachyas dre dhevis an Popet Pek?’

‘Re’m pat, a velder, na rug ve d’rivas oll an dra?” an cothwas du a worthebys, ha wherthyn yn fel. ‘Th’o res dhem d’rivas hedna, barth an tas, bus th’era cosyn Cusk o’marogeth war grohen lagajow ve, ha namna aljama nakevy hanow ma honen, ha pub men-termen y teuth mabm je ha sompna je garow hy lev.

‘Pandra rug ve d’rivas orth an dallath? Me dh’rivys tell o Brojer Conyn creatur barthujek qwyck; dho’n lyha, hen ew towl dhem rag d’rivas e. Wel, a velder, che na ra reckna na hen, rag en dedhyow-na th’o Brojer Conyn ha’y deylu an warthevyjy dho genyver negys camhenjek o dho gawas, en fest diogel glan. Kyns che dho wil ola bar Brojer Conyn, che ra gortas dho weles ple fedh Brojer Conyn war an dyweth. Bus hedna na vern badna en tor-ma.

‘Pa rug Brojer Luarn gawas Brojer Conyn dho vos maglys gen an Popet Pek, ev o lowen tek, o’rolya war an leur hag o’wherthyn. En by-an-by e dheuth ha lawl, a’medh e:

‘”Wel, lyckly me fethas je treveth-ma, Brojer Conyn,” a’medh e; “martessan na, bus lyckly wir. Che bonyas ader dro ha tauntya wara ve uthyk tra, bus lyckly che ew devedhys dho dhyweth an vorr. Che rug prankya en udn stankya en costys-ma tereba che dho grejy dr’oja mester oll an myster. Ha th’esta pub termen en lies plass nag eus lecyans dhese. Pyw a bejys che dho dhos ha metya gen an Popet Pek-ma? Ha pyw a rug glena je lebma th’esta? Den veth en bes ales. Che dheuth ha glena dha honen dho’n Popet Pek-na heb gortas galow veth,” medh Brojer Luarn, a’medh e, “hag awatta se en teller fast tereba me dho guntell predn ha tanya hedna, rag me vedn gwil barbecuw ahanas, hedhow sur,” medh Brojer Luarn, a’medh.

‘Ena Brojer Conyn rug talkya uvel en fras.

‘”Na’m deur an peth a reta ortha ve, Brojer Luarn,” a’medh e, “mar na reta nefra towla ve dho’n hager-dhreysek-na. Gra rostya ve, Brojer Luarn,” a’medh, “bus abera dho’n hager-dhreysek bydnar re dowlowgh ve,” a’medh e.

‘”Kebmys trobel ew anowy tan,” medh Brojer Luarn, a’medh e, “tr’ew lyckly res dhem cregy je,” a’medh.

‘”Crog ve mar uhel der vo plegajow dhese, Brojer Luarn,” medh Brojer Conyn, a’medh, “bus abar’tuw na dowl ve dho’n hager-dhreysek,” a’medh e.

‘”Nag eus genam corden veth,” medh Brojer Luarn, a’medh, “ha lyckly rak hedna me res budhy je,” a’medh e.

‘”Beudh ve mar dhown der vo plegajow dhese, Brojer Luarn,” medh Brojer Conyn, a’medh, “bus na dowl ve dho’n hager-dhreysek-na,” a’medh e.

‘”Nag eus dowr veth en nes,” medh Brojer Luarn, a’medh, “ha lyckly rak hedna me res dygrohedna je,” a’medh e.

‘”Dygrohen ve, Brojer Luarn,” medh Brojer Conyn, a’medh, “skyvel lavalow lagas ve, sqward scovornow ve en udn dhywredhya, ha gra trehy dywverr ve dho ves,” a’medh e, “bus pejy, Brojer Luarn, na dowl ve dho’n hager-dhreysek-na,” a’medh.

‘”Drevan Brojer Luarn o whensys dho hurtya Brojer Conyn mar dhrog dr’alja, e veu gechys gonja war y arrow delher ha towlys en cres an dhreysek abera. Th’era tervans bras lebma rug Brojer Conyn londya en prysk, ha Brojer Luarn a venja gortas rag gweles an peth a ra sewya. By-an-by e glowas nebonen o’celwel e, ha gweles Brojer Conyn a’y sedha ha’n treys crowsegys, an vre pell awarra, war gef corrwedhen kesten, o’cribya an pek mes a’y vlew gen scobmen. Nena Brojer Luarn a gonvedhas y vargen der veu por wadn. Brojer Conyn a garja towla tauntyans arta war y bydn, ha cria:

‘”Denethys ha tevys en dreysek a’man, Brojer Luarn – denethys ha tevys en dreysek a’man!” ha gen hedna ev eth o’lebmel kerr, mar vewek vell gryll en regyth.’