Mer Bùrjestra Kerbons - lovinglivingcornish

Thomas Hardy

“Gober trùssa gora –?” yn medh an pygellor, ha dallath shakya y benn. “Ogh nag eus màn.”

Chaptra 1

Y FËDH COWLWRËS YN SCON

Yma Gerva awoles

In gordhuwher a hâv adhewedhes, pàn na veu an nawnjegves cansvledhen tremenys whath der an tressa rann a’y hës, yth o den ha benyn, yonk aga dew, ha homma ow cherya flogh in hy dywvregh, devedhys adroos bys in or Weydon-Priors, yw treveglos vrâs in Ugh-Wessex. Gwyskys êns y in maner blain, adar drog, kynth esa i’n eur-na pylenecter aflêsus dh’aga semlant, awos cresten a dhoust tew o crunys dh’aga skyjyow ha dh’aga dyllas warlergh travalyans hir heb mar.

An den a’n jeva fygùr teg, tewl an fysment, sevur an vysach; ha’n profîl ow tysqwedhes bos leder y fâss mar scant mayth o serth ogasty. Adro dhodho y cafas jerkyn cot a gorden rûy gell, le coth ès gwedhyl y sewt, o crispows fùstyan ha botonnow corn gwynn warnedhy, lavrak a’n keth stoff, poltregas a lether dyghtys, ha hot cala o gorherys gans canfas du lenter. Yth esa canstel bronnweyth wàr y geyn, degys dre gabester a gron, ha’n eyl penn a grôch collel gora ow palegy in mes anedhy; ha kefrës yth o tardar kelmy gora dhe weles dre an toll. Kerdh an den-ma, compes, dywethyn, o kerdh perthynek dhe’n tiak sley, dyffrans a’n draylyans dydowl yw nas an gonesyas kemmyn; trigys yth esa dres henna, in pùb stap pàn veu trailys, pàn veu trettys, neb sygerneth stordy ha cynycus o specyfyk dhe’n person, hag o showyes kefrës in keschaunj parhus an plegow fùstyan, otta garr gledh, otta garr dhyhow, dell wre ev musura y bâcys.

An pÿth moyha arbennyk, bytegyns – an pÿth a alsa dendyl nôtyans orth kenyver aspiyas heb faladow – hèm o an taw gwithys yn tien gans an copel-ma. Yth esens y ow kerdhes an eyl ryb y gela in fassyon a wrussa, abell, soposya talkyans in lev isel, hebask, pryva intra pobel leun a gesparthecter; saw ken golok, in nes, a vynsa decernya bos an den ow redya pò ow mâkya redya folen ballad, o drÿs dhyrag y dhewlagas heb bos êsy, i’n dorn esa gorrys der an cabester a gron. An chêson hewel-ma – onen gwir? pò fâcys rag scappya cows sqwîthus pàr hap? ny’n gothvia den vÿth saw ev iredy; rag dien o y dawesecter, ha’n venyn heb kemeres cowethas vÿth a’y bresens. In gwiryoneth, hy a gerdhy hy honen oll, marnas an flogh in hy dywvregh. Namna dava elyn camm an den traweythyow hy scoodh, awos hy bos glenys clôssa gylly dh’y denewen heb tùchya; mès whans vÿth, dell hevelly, ny’s teva a sensy y vregh, nag ev ny’n jeva whans a’y frofya; ha’n venyn parys apert, adar perthy marth, rag recêva an taw sconya-ma avell tra naturek. Bÿth pàn veu ger anvenowgh i’n parcel bian-ma, neb whystrans o henna gans an venyn dhe’n flogh – myrgh vunys, o gwyskys in dyllas cot ha botas blou a wias najeth – ha clappyans medhel an flogh in gorthyp.

Dynyak o fâss an venyn yonk dre rêson – ogas yn unnyk – a’y hevufter. Pàn vera hy orth an vyrgh, adenewen dhe’n dor, an vysach o plesont, sêmly, ha spessly awos an fysment dhe gachya i’n gway adreus-ma dewynnow an howl crev y golour, ha crohen hy lagasow ha’y dewfrik êth boll indelha, kepar ha pàn ve hy gwessyow gans tan. Ow trôsya in skeus an kewëdh, hag oll hy freder in taw, y’s teva an tremyn cales, hanter-yêyn, yw kefys in pyw pynag a gryssa bos pùptra possybyl intra dêwla Termyn ha Chauns, lemen martesen gwary teg. An kensa agweth o gweyth Natur; an nessa o lyckly lowr ober an wharheans.

Bos an den ha’n venyn gour ha gwreg, ha tas ha mamm dhe’n vyrgh vian, nyns esa dowt vÿth. Ny wrussa ken perthynas styrya an airgelgh a gemynsys gyllys sëgh o caryes gans an tredden kepar ha comolen wàr an fordh ahës.

Dre vrâs yth esa an wreg ow sensy hy golok stag in rag, kyn na gemery les i’n gweles – yth o vu par dell alsa cafos havalder in kenyver plâss in kenyver pow in Englond i’n sêson-na a’n vledhen; fordh nag o compes na camm, nag o plat na menedhek, ha’n ke o prysk, gwëdh, ken plansow, ha’n re-ma entrys dhe’n studh dulas may whre an del passya dredho in dargan a gynnyaf, ow mos dhe lyw aflan, dhe velen, dhe rudh. Orth pyllen weljek an vanken, ha wàr nessa branchys an kewëdh, yth esa scùllyans a dhoust tôwlys gans degadoryon in hast, an keth doust esa wàr an fordh, ow megy son aga stappys kepar ha leurlen; ha hemma, gans an cowl-dhyfyk a gescows, re beu complys solabrës, owth alowa dhe bùb sownd aral bos clôwys.

Termyn hir nyns esa onen vÿth, saw voys edhen gwann ow seny cân ûsys coth a’n gordhuwher, a vedha clôwys wàr an vre i’n keth eur, ha gans an kethsam dascrena, qwaverow, brevow, in kenyver howlsedhas a’n sêson-na dres cansvledhynnyow dynyver. Saw peskytter may fowns y ow nes’he dhe’n dreveglos, yth esa criow ha hùbbadùllya pell ow tos dh’aga scovornow in mes a neb tyller uhel i’n qwartron-na, o cudhys whath adrëv glasneth. Kettel veu treven wàr amal Weydon-Priors devedhys dhe wel, an mêny bian a dheuth warbynn pygellor a’n tùrnyp, ha’y bygal wàr y scoodh, ha scryp y groust ow cregy warnedhy. Desempys an redyor a dherevys y wolok.

“Eus gober obma?” ev a wovynnas yn fygyl, ow sîna gans an folen tro ha’n dreveglos dhyragtho. Hag abàn dybys na wodhya an gonesyas y borpos, ev a geworras, “Gober trùssa gora?”

Pygellor an tùrnyp a dhalathas dystowgh shakya y benn. “Dar, pana furneth eus in den, selwys re bo, may teffa dhe Weydon i’n sêson-ma rag gober a’n par-na?”

“Dhan eus chy dhe rentya – penty nowyth bian, byldys agensow, pò tra gepar?” a wovynnas y gela.

An gwethavor a bêsyas yn negedhek. “Dystryppya yw gnas Weydon kynj oll. Pymp chy a veu tennys dhe’n dor warleny, ha hevleny try; ha’n weryn heb trigva vëth – nâ, heb crow deves kyn fe; atta manerow Weydon-Priors.”

An trùssor a’n gora, galwans ev yn apert, a wrug inclynya y benn gans trèm tamm gothys. Ow meras tro ha’n treveglos ev a leverys pelha, “Yma bytegyns neb happyans omma, a nyns eus?”

“Eâ. Dëdh an Fer. Kyn na glôwowgh lemmyn ma’s clatter ha scùrel, kemeres mona a flehes ha felyon, rag an negys gwir yw gwrës moy abrÿs. My a wre gwil ow whel ha’y glôwes oll an jorna, mès nynj êth avy – nâ, nynj o negys vy.”

GERVA – GLOSSARY

Definitions have generally been confined to those relevant for the story. To keep the glossary to a manageable length the listing excludes the most common words. These are best looked up in Gerlyver Kescows (Ian Jackson).

On-line at https://www.skeulantavas.com/vocabulary/gerlyver-kescows-2nd-edition

If you need grammar, by far the most helpful book is Desky Kernowek (Nicholas Williams, Evertype 2012).

The system of notation in the following list is the same as in Gerlyver Kescows 2nd edition. In particular, the symbol ‖ indicates a word with two stresses of more or less equal force, and an underlining shows a single stress when it does not fall on the penultimate syllable of the word.

Thomas Hardy thinly disguised the geography of his ‘Wessex’ novels by changing many place-names. Dorchester becomes Casterbridge, Hampshire has been renamed Upper Wessex, and Weyhill is called Weydon-Priors.

abell adv from afar

abrÿs adv early

adreus adv slantwise

adroos adv on foot

aflan adj dingy

aflêsus adj disadvantageous

agweth f agwedhow phase

atta = otta

ballad m baladys ballad

branch m branchys branch

brev m brevow breve

bronnweyth m rushwork

bùrjestra f bùrjestrevow borough

canfas m canvas

clappyans m babble

clatter m clatter

comolen f comolow nimbus

corden rûy f corduroy

crôch m crutch

dascrena v trill

draylyans m shamble

dulas ‖ adj blackened-green

dydowl adj desultory

dynyver adj untold

dystryppya v pull down

fùstyan m fustian

fysment m fysmens countenance

glasneth m greenery, foliage

gonesyas m gonesyjy labourer

gweljek adj grassy

gwethavor m gwethavoryon pessimist

happyans m happyansow event

heb faladow phr without fail

hebask adj easy, calm

hevufter m mobility

hùbbadùllya m rattle, din

kemynsys m familiarity

Kerbons ‖ place-name Casterbridge

kesparthecter adj reciprocity

kewëdh col hedge(row)

lemen prep except

lenter adj glazed

mâkya v make a show of

menedhek adj hilly

mer m mêras mayor

nas f nâsyow disposition

parcel m & f group

parhus adj continuous

perthy marth phr exhibit surprise

poltregas pl leggings

profîl m profîlyow profile

prysk col prysken shrubs

pygal f pygolow hoe

pygellor m pygelloryon hoer

pylenecter m shabbiness

qwaver m qwaverow quaver

redyor m redyoryon reader

scùllyans m scattering

scùrel ‖ m scurry

showya v show

sygerneth m indifference

talkyans m chat

tardar m terder whimbrel

tawesecter m taciturnity

travalyans m trek, journey

trèm f look

trettya v tread

trôsya v trudge

tùrnyp col tùrnypen turnips

Ugh-Wessex ‖ place-name Upper Wessex