Sîlas Marner

George Eliot

Ros nedha a'n gis serth, skeusen gans Perkarkalic

Lecyans Creative Commons Attribution-Share Alike 4.0 International

CHAPTRA 1

Kernowek © 2025 Ian Jackson

Yma Gerva awoles

Whel nag yw gorfednys na whath

I’n dedhyow may fedha rosow nedha ow whyrny bysy i’n treven tiak – ha lies dama kyn fe brâs, gans owrlyn ha lâss neus adro dhedhy, a’s teva ros nedha avell gwariel, ros vunys a bredn derow polyshys – yth esa dhe spia in broyow pell mesk an hensy cul, pò aberveth in ascra an brynyow, neb tus gwydnyk aga fâss, lettyes aga thevyans, ha semlant an re-ma a wel dhe weryn geherek an pow o kepar ha remnant a hil dhyserytys. Y fedha ky an bugel owth hardha fers pàn omdhysqwedhas onen a’n dus gis estren-ma wàr an uheldir, tewl orth kilva howlsedhas an gwâv avarr; rag fygùr stubmys in dadn sagh poos, pana gy yw hebma dâ ganso? – ha bohes venowgh y fedha an wynygyon-ma ow travalya heb an begh kevrînek-na. An bugel y honen, kynth o va sur lowr nag esa i’n sagh ma’s neus lin, poken an rolyow hir a lien nedhys a’n neus-na, nyns o va pòr certan an gwians-ma, creft a res porrês kyn fe, dhe vos gwrës heb gweres an Tebel-El yn tien. I’n termyn pell-na yth esa fâls-crejyans ow clena adro dhe bùb person py tra o ùncoth in neb fordh, kefrës only traweythys a’n sêson, dell o vysytys an gwycor pò malor an kellyl. Ny wodhya den vëth pleth esa dhe wandrysy aga thrigva pò aga devedhyans; ha fatla ylly den bos styrys mar ny aswonyth dhe’n lyha nebonen mayth o aswonys y das ha’y vabm? Dhe’n werynoryon a’n dedhyow coth, an bÿs avês dh’aga experyens dydro aga honen o tyller a dhysclerder hag a vystery: dhe breder aga vrës dydravel studh gwandrans o conceyt maga anweladow avell bêwnans gwâv an gwenyly a vedha ow tewheles gans an gwaynten; ha kefrës an trevesygor, mara teuth a vro bell, scant ny cessyas bos sensys in dadn remnant a worgîs, a via preventya pùb marth mara pe cors hir a fara whar dewedhys in neb drog-ober; spessly mars esa hanow dhodho rag skentoleth, pò mar kylly showya skians in creftweyth. Kenyver codnek, boneyl in ûsyans scav a’n tavas (ass yw daffar tyckly) bò in ken art nag o godhvedhys gans tus an bendra yn tâ, o drogdybys heb let: pobel wiryon, genys ha megys in maner hewel, nyns êns pòr fur pò conyng – dhe’n lyha, nyns êns y marnas convedhes, rag ensampyl, sînys an awel; ha’n argerth may fe toth ha sleyneth gwainys a neb ehen, hèm o mar gudhys in dadn gel, mayth esa an re-ma ow kesudnya gans an pystry. I’n fordh-ma y wharva bos an wiadoryon gescar a lien – dyvroysy a'n dre dhe’n pow – o sensys bys i’n dyweth avell estrednyon gans aga hentrevogyon diogus, hag ûsys dhe gemeres an lies devos aneghlek yw longus dhe stât an unycter.

GERVA –  GLOSSARY

Definitions have generally been confined to those relevant for the story. To keep the glossary to a manageable length the listing excludes the most common words. These are best looked up in Gerlyver Kescows (Ian Jackson).

On-line at https://www.skeulantavas.com/vocabulary/gerlyver-kescows-2nd-edition

If you need grammar, by far the most helpful book is Desky Kernowek (Nicholas Williams, Evertype 2012).

The system of notation in the following list is the same as in Gerlyver Kescows 2nd edition. In particular, the symbol ‖ indicates a word with two stresses of more or less equal force, and an underlining shows a single stress when it does not fall on the penultimate syllable of the word.

a wel dhe prep by the side of

an Tebel-El m the Evil One

aneghlek adj eccentric

anweladow adj dim

ascra f bosom

begh m burden

bugel m bugeleth shepherd

conyng adj clever

creftweyth ‖ m handicraft

derow col derowen oaks

devos f devosow habit

dydravel adj untravelled

dysclerder m vagueness

dyseryta v disinherit

fâls-crejyans ‖ m superstition

gorgîs m suspicion

gwandrans m wandering

gwandryas m gwandrysy wandering man

gwiador m gwiadoryon weaver

gwians m weaving

gwycor m gwycoryon pedlar

keherek adj brawny

kescar adj scattered

malor m maloryon grinder

mystery m mysterys mystery

preventya v prevent

pystry m conjuring

ros nedha f rosow spinning-wheel

showya v show

tiogus adj rustic

travalya v stir abroad

traweythys adj intermittent

trevesygor m trevesygoryon settler

unycter m loneliness

ûsyans m use

whyrny v hum