Maria Dhu


Maria Dhu yw cries inwedh ‘Gwedhowes Dhu’, ‘Arlodhes Plos’, ‘Scowt Slynk’, ha lacka vëth. An meder yw goheles gwainya tryckys ow comprehendya neb carten Colodnow pò Myternes an Palyow. Nyns eus kescowethyans furvus: yma pùb gwarior ow qwary abarth y honen oll. Maria Dhu yw fytty rag try gwarior spessly, kynth eus peswar bys seyth ow servya yn tâ.


CARTEDNOW

Pack kemyn a 52 garten. Ordyr an cartednow yw Âss Mytern Myternes Knâva Deg Naw Eth Seyth Whegh Pymp Peswar Try Dew. Nyns eus trùmp. Mars eus try gwarior, kebmer Dew an Mùllyon in mes. Mars eus peswar gwarior, na gebmer carten vëth in mes. Mars eus pymp gwarior, kebmer Dew an Mùllyon ha Dew an Diamons in mes. Mars eus whegh gwarior, kebmer pùb Dew in mes. Mars eus seyth gwarior, kebmer pùb Dew in mes, marnas Dew an Colodnow.


RADNANS

Yma an radnans ha fros an gwary ow mos gans an howl. Gwra radna oll an cartednow onen hag onen. 


MEDER

Goheles gwainya tryckys ow comprehendya neb carten Colodnow, ha goheles gwainya an tryck usy ow comprehendya Myternes an Palyow. Yma pùb Colon ow tylly 1 poynt warbydn hy gwainyor, ha Myternes an Palyow ow tylly 13 poynt.


KESCHAUNJ

Kyns dallath an gwary, yma pùb gwarior ow kemeres teyr harten in mes a’y dhorn ha’ga istyna, aga fâss dhe’n bord, dhe’n gwarior adhyhow, ha recêva teyr harten, aga fâss dhe’n bord, dhyworth an barth cledh. Bysy yw pùb gwarior dhe dhôwys hag istyna cartednow kyns es kemeres an cartednow in bàn a wrug recêva. Mars eus moy ès peswar gwarior, an ûsadow yw istyna dyw garten only.


FROS AN GWARY

Yma an gwarior aglêdh dhe’n radnor ow pleynya kensa oll. A’y wosa yma gwainyor a neb tryck ow pleynya orth an nessa. Gwarior a yll bleynya neptra vëth – y hyller bleynya Colon pò Myternes an Palyow. Res yw holya an sewt bleynys mars yw possybyl. Mar ny ylta holya, te a yll gwary ken sewt. An tryck yw gwainys der an uhella carten a’n sewt bleynys.


RECKNA AN SCOR

Wàr dhyweth an dorn, yma pùb gwarior ow reckna y gartednow, hag ow scorya 1 poynt kereth rag pùb Colon, ha 13 poynt kereth rag Myternes an Palyow. Yma an gwary ow turya erna wrella udn gwarior ow trehedhes 50 poynt. An gwarior mayth eus an iselha cowl-sùm dhodho i’n eur-na, hèn yw an gwainyor.