Tesen Safron a Gernow


CORNISH SAFFRON CAKE


Gans nôtyans grassys dhe Brigitte Hafner a'n receyt

ha dhe Marina Oliphant a'n skeusen



Otta tesen dhelycyùs dhe spredya amanyn warnedhy pàn vo kemerys tobm in mes a’n forn. Yma hy dhe witha yn tâ lowr. Y hyller hy crasa yn scav.


Devnyth

½ lo tê neus safron

150 mylylîter leth ha nebes loyow brâs moy anodho

25 gràm gwel fresk a’n pebor (pò gwel sëgh, mès le y vlas)

450 gràm bleus gwaneth plain

½ lo tê holan

60 gràm manshùgra

½ knofen mùscat, rathellys

½ lo tê canel

120 gràm amanyn dyholan, kemerys in mes a’n yêynor hanter-our kyns ûsya

100 gràm fyges Corynt

2 lo vrâs manshùgra, rag kenen


MANER PARUSY

Ragtobma an forn bys in 200 degrê Celsyùs.

Gorr neus an safron wàr servyour pobas heb glena hag aberth i’n forn rag rôstya 5 mynysen dhe’n moyha.

In pot pò corrdodnor, gwra tobma an leth, bys may fo mygel. Gwasca neus an safron inter an besias ha scùllya aberth in hanaf. Addya 2 lo vrâs a’n leth mygel ha gorra adenewen rag godrotha.

Gwra browsy an gwel fresk in bolla, addya myjyn a shùgra ha’n leth mygyl. Fusta gans forgh bys may fo kesudnys. Cudha ha gorra in neb tyller tobm (27 bys 32 degrê Celsyùs) ha pell dhyworth pùb wheth, rag 20 mynysen pò bys may fo ewon scav. Saya an bleus ha’n holan aberth in scala. Addya an shùgra ha’n spîcys ha rùttya an amanyn aberth ino, trehys fin, bys may fo hevelep dhe vrowsyon garow a vara. Gwil dol ha devera an lydn gwel-safron ajy.

Gwra tosa yn whar bys may fo smoth hag ow formya pellen.

Gorr an toos in scala oylys scav, cudha ha gasa dhe dherevel i’n keth tyller tobm rag 1½ bys 2 our – pò bys may fo an toos ogas doblys y vrâster.

Gwra addya an fyges Corynt dhe’n toos ha tosa warbarth wàr arenep blusys, bys may fo kesudnys. Shâpya dhe dorth ha gorra in form pobas torth, urys yn tâ. Cudha ha gasa dhe dherevel unweyth arta i'n keth tyller tobm rag hanter-our kyns pobas rag ogas ha 35 mynysen pò bys may fo gell owrek awartha (gwra checkya wosa 30 mynysen).

Gwra kemysky 2 lo vrâs a leth ha 2 lo vrâs a vanshùgra ha, pàn vo an dorth tobm whath, scubya gans an kemyskyans.

Gas dhe vygla nebes kyns trailya mes.