© 2023 Nicholas Williams
Pùb gwir gwethys / All rights reserved
Clyckya obma ha goslowes / Click here to listen
Text an recordyans / Text of the recording
Egery in dyw several fenester rag gweles an text ha goslowes i’n kettermyn.
Open in two separate windows to see the text and listen at the same time.
Êsôp o whedhlor Grêca genys adro dhe whe cans hag ugans dhyrag Crist. Nyns usy scriven vÿth dhe gafos dhyworto hag in gwiryoneth nyns eus dùstuny certan fatell vêwas ev bythqweth. Yma cùntellyansow a whedhlow ascrîbys dhodho bytegyns kefys in lies tavas. William Caxton a bryntyas versyon in Sowsnek i’n vledhen peswardhek eth deg peswar. Yma meur a’y whedhlow ow tyghtya bestas denfurvek pò ‘anthropomorphic’ hag y ow tesky lesson a valew. Rag ensampyl yma udn whedhel ow terivas adro dhe vran usy darn brâs keus in hy gelvyn. Lowarn a dheu dhedhy hag a dhallath hy flattra rag tecter hy fluv spladn du. Yma an lowarn ow pêsya hag a lever fatell o fest melôdyùs lev tas an vran. Ena ev a omwovyn mars yw mar deg lev an vran hy honen. Yma an vran owth egery hy gelvyn rag renky yn anwhek. Otta an keus ow codha dystowgh wàr an dor. Yma an lowarn orth y dhalhedna hag ow tyberth in udn wherthyn. Lesson an whedhel-na: bÿdh war a nebonen a vo worth dha flattra. Dre lycklod nyns yw ev ma’s rag y les y honen. Yma whedhel aral ow pertainya arta dhe lowarn. Ev a wel grappys athves wàr wedhen grappys, saw y yw re uhel dhyworto ha ny yll ev aga drehedhes. Kynth usy ev owth assaya pùptra rag cafos an grappys, nyns usy ev ow soweny. Wàr an dyweth yma va ow forsâkya an attent. Ha pàn vo ev ow tyberth, ev a lever dhodho y honen: ‘Dre lycklod yth o wherow an grappys-na.’ Lesson an whedhel: pàn vo nebonen ow whansa neb tra saw heb bos abyl dh’y gafos, yn fenowgh ev a lever dhodho y honen nag yw desîradow an dra whensys. Heb mar yth yw an whedhel-na penfenten an lavar ‘grappys wherow’. Yma whedhel aral ow terivas adro dhe gy usy a’y wroweth in presep buwgh. An vuwgh a garsa debry gora an presep. Ny yll an ky y dhebry rag nyns yw gora sosten rag keun adar rag buhas. Lesson an whedhel-na yw hebma: yma pobel i’n bÿs neb a’s teves taclow na yllens y gwil devnyth anodhans, saw y yw mar honenus nag yns y parys dhe alowa pobel erel dh’aga ûsya. Heb mar yth yw an whedhel-ma penfenten an lavar ‘ky i’n presep’. Yth yw whedhel an ky i’n presep onen a’n gwelha aswonys a oll whedhlow Êsôp. Coynt lowr nyns yw an whedhel ascrîbys dhe Êsop bys in secùnd hanter an pymthegves cansvledhen. Jean de La Fontaine o prydyth a’n seytegves cansvledhen a screfas versyon a whedhlow Êsôp in bardhonogow Frynkek. Y whedhel An culyak reden ha’n vùryonen rag ensampyl y aswonys dâ. Yma an vùryonen ow spêna an hâv yn tywysyk ow cùntell sosten rag an gwâv. Saw yma an culyak reden ow passya oll an hâv ow cana. Pàn dheffa an kydnyaf, yma an culyak reden in dyvotter brâs, hag yma hy ow pesy an vùryonen dh’y gweres. ‘Fatla wrussowgh why passya an hâv?’ yn medh an vùryonen? ‘Ow cana’ yw an gorthyp. ‘Yn tâ,’ yn medh an vùryonen, ‘Dauncyowgh lebmyn.’
Clyckya pò tava obma rag redya whedhel Êsôp An ky ow ton kig